Usta 50 il əvvəl 2 minə aldığı maşınla milyonçu oldu - FOTO

1970-ci illərdə Uelsdə gənc bir mexanik 900 funt-sterlinq qarşılığında aldığı “Aston Martin DB5 Vantage” avtomobili ilə illər sonra milyonçu olub. 

Avtosfer.az xəbər verir ki, o zaman 900 funt təxminən 50.000 funt-sterlinq ekvivalenti kimi qiymətləndirilirdi və bu məbləğ bugünkü ailə SUV-lərinin qiyməti ilə müqayisə edilə bilər. Avtomobil 45 il yolda unudulduqdan sonra bərpa edilib və hazırda dəyəri 1 milyon funt-sterlinqdən (təxminən 23 milyon manat) artıqdır.

Hadisə 1970-ci illərdə karyerasına yeni başlayan gənc mexanik Con Uilyamsın uşaqlıq arzusunu həyata keçirməsi ilə başlayır. O, hələ uşaq ikən “Aston Martin DB5 Vantage” almaq üçün 900 funt-sterlinqə qənaət edib. Williams üçün bu avtomobil yalnız nəqliyyat vasitəsi deyil, həm də ehtiras və həyat tərzi idi.

Gənc mexanik dörd il boyunca hər gün avtomobili sürdü. Lakin Yaxın Şərqdə iş təklifi aldıqda “Aston Martin”-i satmaqdan imtina etdi və avtomobil 45 il ərzində yol kənarında tərk edildi. Bu müddət ərzində avtomobil açıq havada qaldığı üçün boyası soyulmuş, mamırla örtülmüş, salonu çirklənmiş və alüminium korpusu oksidləşmişdi.
Williams avtomobilin nadirliyini və dəyərini nəzərə alaraq bərpa qərarı verdi. O, avtomobillərin bərpası üzrə ixtisaslaşmış “Aston Martin Works” şirkəti ilə əməkdaşlıq etdi. Bərpa işləri üç il çəkdi və 2.500 saat ciddi iş tələb etdi. Şassi və xarici panellər yeniləndi, mühərrik bərpa olundu, salon tamamilə yeni görkəm aldı.

Bu gün “Aston Martin DB5 Vantage” Con Uilyamsa açarların ilk verildiyi gündəki kimi parlaq və diqqətçəkəndir. Avtomobilin astronomik dəyəri onun nadirliyindən irəli gəlir: indiyə qədər istehsal edilmiş 1.022 DB5-dən yalnız 39-u “Vantage” versiyasıdır.

DB5, eyni zamanda, “Qızıl barmaq” filmində Ceyms Bondun avtomobili kimi pop-mədəniyyət simvoluna çevrilib. Kapotun altında 325 at gücündə 4,0 litrlik altı silindrli mühərrik yerləşir və avtomobil cəmi 6,5 saniyəyə 100 kilometr-saat sürətə çata bilir.

Astronomik dəyərinə baxmayaraq, Con Uilyams sevimli avtomobilini satmaq niyyətində deyil. Onun üçün DB5 sadəcə bir investisiya deyil, onilliklər boyu davam edən ehtirasın simvolu və həyatının ayrılmaz bir hissəsidir.

Eltac Züflüqaroğlu