Yanacaq tankerinin çəni niyə içəriyə çökür? – Səbəbi AÇIQLANDI - VİDEO

Bəzən iri metal çənlərin və ya maye saxlanılan rezervuarların qəfil içəriyə doğru çökdüyü görüntülər sosial şəbəkələrdə maraqla qarşılanır. İlk baxışdan bunun səbəbi “vakuum” kimi görünsə də, prosesin arxasında fiziki təzyiq fərqi dayanır.

Avtosfer.az xəbər verir ki, çənin daxilindəki qaz soyuduqda və kondensasiya baş verdikdə daxili təzyiq azalır. Eyni hal mayenin nasos vasitəsilə çəndən çıxarılması zamanı içəri kifayət qədər hava daxil olmadıqda da baş verə bilər.

Daxildə təzyiq azaldıqca çənin xaricindəki atmosfer təzyiqi üstünlük təşkil edir. Nəticədə atmosferin yaratdığı qüvvə çənin divarlarına xaricdən içəriyə doğru təsir göstərməyə başlayır.

Daxili təzyiq atmosfer təzyiqini kifayət qədər tarazlaya bilmədikdə isə çən yaranan təzyiq fərqinə tab gətirmir və divarları içəriyə doğru çökə bilər.

Burada “vakuum çənin içəriyə çəkilməsi” kimi bir proses yoxdur. Əsas səbəb çənin daxilində təzyiqin azalması və xarici atmosfer təzyiqinin çənə daha böyük qüvvə ilə təsir göstərməsidir.

Bu hadisə xüsusilə təzyiq fərqinə davam gətirəcək şəkildə layihələndirilməyən və ya havalandırma sistemi düzgün işləməyən çənlər üçün təhlükəli ola bilər. Buna görə də belə qurğularda təzyiqin tənzimlənməsi və kifayət qədər havalandırmanın təmin edilməsi mühüm əhəmiyyət daşıyır.

Eltac Zülfüqaroğlu