Yeni kəşflə avtomobillərin proqram təminatını qarajda güncəlləmək mümkün olacaq - ARAŞDIRMA

Yeni bir avtomobil aldığınız zaman əslində onun “ən pis” versiyasına sahib olursunuz. Çünki illər keçdikcə texnologiya köhnəlir, imkanlar məhdudlaşır. Lakin avtomobil sənayesində bu anlayış artıq tarixə çevrilmək üzrədir. Avtomobil istehsalçıları kapotun altında səssiz, amma köklü bir inqilaba start veriblər.

Avtosfer.az xəbər verir ki, avtomobilin klassik anlayışı dəyişir. Mühərrik, şassi və kuzov kimi aparat təminatı artıq əsas rolda deyil. Yeni dövrdə sükanı ələ alan proqram təminatıdır. Bu yanaşma avtomobil sənayesində Proqram Təminatı ilə Təyin Edilmiş Nəqliyyat Vasitələri (SDV – Software Defined Vehicle) adlanır.

Əvvəllər avtomobil alırdınız və o, istehsal xəttindən çıxdığı vəziyyətdə illərlə dəyişməz qalırdı. “GlobalLogic İsveç” şirkətinin baş meneceri Stefan Gitye bu prosesi mobil telefonlarla müqayisə edir:

“Yeni telefon aldıqdan sonra yeniləmələrlə onun daha sürətli və funksional olduğunu görürük. Avtomobillər də eyni istiqamətdə inkişaf edəcək”, – deyə o bildirib.
Mütəxəssislərin hesablamalarına görə, bu yeni yanaşma 2030-cu ilə qədər təxminən 600 milyard dollar dəyərində nəhəng bir bazarın formalaşmasına səbəb olacaq.

Əvvəllər avtomobil üçün proqram təminatının hazırlanması orta hesabla 3 il çəkirdisə, bu gün proses daha mürəkkəb və genişmiqyaslıdır. Lakin artıq mühəndislər fiziki avtomobilin hazır olmasını gözləmir. Bulud texnologiyaları və “rəqəmsal əkizlər” – yəni nəqliyyat vasitəsinin virtual modelləri – bu sahədə əsas rol oynayır. Bunun sayəsində sistemlər real avtomobil istehsal edilməmişdən əvvəl virtual mühitdə sınaqdan keçirilir, mümkün nasazlıqlar erkən mərhələdə aşkarlanır və bir proqram təminatı eyni anda bir neçə fərqli modeldə istifadə oluna bilir.

Bu dəyişikliklər təkcə istehsalçılar və mühəndislər üçün deyil, sürücülər üçün də ciddi üstünlüklər yaradır. Artıq bir çox yeniləmələr üçün servis mərkəzinə getməyə ehtiyac qalmayacaq. Avtomobil qarajda dayanarkən, gecə saatlarında proqram yenilənməsi avtomatik həyata keçirilə biləcək. Məlumat-əyləncə sistemləri və təhlükəsizlik funksiyaları daim yenilənəcək, avtomobil texnoloji baxımdan köhnəlməyəcək. Hətta gələcəkdə abunə sistemi vasitəsilə avtomobilə sonradan “İdman rejimi” və ya “Avtonom sürücülük” kimi funksiyaların əlavə edilməsi də mümkün olacaq.

Beləliklə, avtomobil sənayesində əsas rəqabət artıq daha güclü mühərrik istehsal etmək üzərində deyil. Qalib gələn tərəf daha ağıllı, daha təhlükəsiz və daha çevik proqram təminatı hazırlayan istehsalçı olacaq. Sənaye metal və mexanikadan uzaqlaşaraq, sürətlə kod və rəqəmsal texnologiyalara yönəlir.

Eltac Zülfüqaroğlu