Yeni yol nişanını görənlər təəccüblənir - Mənası məlum oldu

ABŞ yollarında sürücülərin qarşısına çıxan və ilk dəfə görənlərin mənasını anlamadığı yeni yol nişanının nə məqsədlə istifadə edildiyi açıqlanıb.

Avtosfer.az xəbər verir ki, Ağ fonda qara rəngli, yuxarı qaldırılmış və çarpaz baş barmaq simvolu olan dairəvi nişan həmin ərazidə avtostopla sərnişin götürməyin qəti qadağan olduğunu bildirir.

Bu nişan sürücülərin və piyadaların təhlükəsizliyini təmin etmək məqsədilə müəyyən ərazilərdə, xüsusilə də həbsxanaların ətrafındakı yollarda yerləşdirilir.

Çarpaz baş barmaq simvolu olan bu qadağanedici nişan piyadaların yol kənarında dayanaraq avtomobilləri saxlamasının qarşısını almağa xidmət edir.

Xüsusilə həbsxanaların yaxınlığındakı yollarda belə nişanların yerləşdirilməsinin əsas səbəblərindən biri məhbusların müəssisədən qaçdıqdan sonra avtostopla başqa əraziyə getməsinin və ya nəqliyyat vasitəsini ələ keçirərək qaçmasının qarşısını almaqdır.

Bundan başqa, yüksək sürətli yollarda piyadaların avtomobilləri saxlamağa çalışması ciddi qəza və həyat təhlükəsi yarada bilər. Buna görə də nişanlar təhlükəsizlik baxımından mühüm hesab olunan marşrutlarda quraşdırılır.

Beləliklə, ilk baxışda qeyri-adi görünən çarpaz baş barmaq işarəsi sadəcə avtostopun qadağan olduğunu bildirən xüsusi yol nişanıdır./Musavat.com