Yol bağlanmadan təmir mümkündür – İsveçrədən maraqlı həll - VİDEO

İsveçrədə magistral yollarda aparılan təmir işləri zamanı nəqliyyatın hərəkətini dayandırmamaq üçün innovativ həll tətbiq edilir. Söhbət ASTRA Bridge adlanan mobil körpü sistemindən gedir.

Avtosfer.az xəbər verir ki, bu sistem təmir aparılan yol hissəsinin üzərinə quraşdırılır. Nəticədə avtomobillər körpünün üzəri ilə təxminən 60 km/saat sürətlə hərəkət etdiyi halda, yol işçiləri onun altında asfalt örtüyünün sökülməsi, yenilənməsi və digər təmir işlərini təhlükəsiz şəkildə həyata keçirirlər.

Yeni texnologiya yol təmiri zamanı hərəkət zolaqlarının tam bağlanmasına ehtiyacı minimuma endirir. Bu isə həm uzun tıxacların yaranmasının qarşısını alır, həm də sürücülər və yol işçiləri üçün daha təhlükəsiz iş şəraiti yaradır. İsveçrə Federal Avtomobil Yolları İdarəsi bu sistem sayəsində təmir müddətində magistral yollarda ən azı iki hərəkət zolağını daim açıq saxlaya bilir.

Bu təcrübə Bakı üçün də maraqlı nümunə hesab oluna bilər. Paytaxtda əsas prospekt və magistral yollarda aparılan təmir işləri zamanı zolaqların bağlanması əksər hallarda uzun tıxaclara səbəb olur. Xüsusilə günün pik saatlarında yol hərəkətində ciddi sıxlıq yaranır və sürücülər vaxt itirirlər.

Belə mobil körpü sistemlərinin gələcəkdə Bakı yollarında da tətbiqi təmir işlərinin daha sürətli və təhlükəsiz aparılmasına, eyni zamanda nəqliyyatın fasiləsiz hərəkətinin təmin edilməsinə töhfə verə bilər. Bu yanaşma həm yol infrastrukturunun müasirləşdirilməsi, həm də şəhərdə nəqliyyat axınının daha səmərəli idarə olunması baxımından diqqətçəkən həllərdən biri kimi qiymətləndirilir.

Eltac Zülfüqaroğlu

​​​​​​​