Avtomobilin alt hissəsini yumadıqda sürücüləri hansı təhlükə gözləyir? - FOTO

Avtomobil sahiblərinin əksəriyyəti nəqliyyat vasitələrini vaxtaşırı yuyur və təmiz saxlayır. Ancaq çoxları yalnız avtomobilin görünən – yəni üst hissələrinin təmizliyinə diqqət yetirir.

Avtosferaz xəbər verir ki, halbuki avtomobilin alt hissəsinin də yuyulması və mütəmadi təmizlənməsi mühüm əhəmiyyət daşıyır.

Çöldən təmiz görünən avtomobilin altında görünməyən problemlər yığılır. Xüsusilə qış aylarında yollara səpilən duzlar, palçıq və yol zibilləri avtomobilin alt hissəsinə toplanaraq metal səthlərlə təmasda olduqda korroziya yaradır. Bu isə zamanla avtomobilin alt hissəsində ciddi paslanmaya və zədələnmələrə səbəb ola bilər.

Avtomobilin alt hissəsində yığılan çirk və kimyəvi maddələr bir çox texniki nasazlıq riskini də artırır. Məsələn, əyləc sistemində oksidləşmə baş verə bilər ki, bu da əyləc qabiliyyətinin azalması və ya əyləclərin tutulması ilə nəticələnə bilər. Eyni zamanda, asqı sistemində, səsboğucuda və şassi hissələrində zədələnmələr meydana çıxa bilər.

Üstəlik, bu çirklərin toplanması avtomobilin çəkisini artıraraq yanacaq sərfiyyatına və ümumi performansa da mənfi təsir göstərir. Artan sürtünmə nəticəsində avtomobil daha çox enerji sərf edir və sürücülük təcrübəsi də zəifləyir.

Ekspertlər bildirirlər ki, avtomobillərin alt hissəsinin yuyulması yalnız estetik baxımdan deyil, texniki cəhətdən də zəruridir. Bu həm avtomobilin ömrünü uzadır, həm də təhlükəsizlik baxımından riskləri minimuma endirir.

Eltac Zülfüqaroğlu