LED, yoxsa lazer işıq sürücünün görmə qabiliyyətinə daha müsbət təsir edir? – ARAŞDIRMA - FOTO

Son illərdə elektrikli və avtonom idarəetməyə malik avtomobillərin sürətlə yayılması ilə birgə bəzi ənənəvi texnologiyalar tarixə qovuşmaq üzrədir. Onlardan biri də duman əleyhinə işıqlardır.

Avtosfer.az xəbər verir ki, əvvəllər ön bamperin aşağı hissəsində yerləşən və yağışlı, dumanlı havalarda təhlükəsizliyi artıran bu işıqlar artıq bir çox yeni nəsil avtomobildə yer almır. Bunun əsas səbəblərindən biri avtomobil işıqlandırma sistemlərinin texnoloji inkişafıdır.

Artıq istehsalçılar halogen faralar əvəzinə daha effektiv və güclü LED faralara üstünlük verirlər. LED fənərlər ağ işıq sayəsində gecə və pis hava şəraitində daha aydın görünüş təmin edir və duman əleyhinə işığın funksiyasını əvəzləyir.

Bundan əlavə, adaptiv fara sistemləri də duman işıqlarına olan ehtiyacı azaldır. Bu texnologiya avtomobilin sürətinə və sükan bucağına uyğun olaraq faraların istiqamətini tənzimləyir və yolu optimal şəkildə işıqlandırır.

Lazer faralar isə daha çox premium modellərdə istifadə olunur və LED texnologiyasından da güclüdür. Bu sistemlər uzaq məsafələri daha yaxşı işıqlandıraraq görmə dairəsini artırır.

Texnoloji inkişaflarla yanaşı, avtomobil istehsalçılarının daha minimalist dizaynlara üstünlük verməsi də bu dəyişimin səbəblərindən biridir. Əvvəllər duman işıqlarının yerləşdiyi hissədə indi daha çox sensorlar və təhlükəsizlik sistemləri quraşdırılır. Bu, həm estetik baxımdan daha cəlbedici görünüş yaradır, həm də yer qənaətinə imkan verir.

Beləliklə, müasir texnologiyalar həm görmə qabiliyyətini artırır, həm də duman əleyhinə işıqlara ehtiyacı aradan qaldırır.

Eltac Zülfüqaroğlu