Maşında bu düymənin nə işə yaradığını bilirdiniz? - TÖVSİYƏ - FOTO

Avtomobil texnologiyasının inkişafı ilə birlikdə sürücülərin tez-tez qarşılaşdığı, lakin hər zaman mənasını bilmədiyi bəzi işarələr yenidən diqqət mərkəzinə düşüb.

Avtosfer.az xəbər verir ki, xüsusilə köhnə model nəqliyyat vasitələrinin mexaniki transmissiya qollarında yer alan “E” simvolunun funksiyası ilə bağlı maraq doğuran suallara aydınlıq gətirilib.

Mütəxəssislərin sözlərinə görə, “E” hərfi “Ekonom” (qənaət) rejimini ifadə edir və əsas məqsədi yanacaq sərfiyyatını azaltmaqdır. Bu rejim mühərrikin daha aşağı dövrlərdə işləməsini təmin edərək sürücünü daha tez yüksək ötürmələrə keçməyə təşviq edir. Nəticədə, həm yanacaq sərfiyyatı azalır, həm də mühərrikin üzərinə düşən yük minimuma endirilir.

Bildirilir ki, bu xüsusiyyət əsasən uzun məsafəli səfərlərdə daha effektiv nəticə verir. Magistral yollarda sabit sürətlə hərəkət zamanı “E” rejimi avtomobilin daha səmərəli işləməsinə kömək edir və əlavə xərclərin qarşısını alır.

Eyni zamanda, bu rejim təkcə yanacağa qənaətlə məhdudlaşmır. Qəfil sürətlənmələrin qarşısını alaraq daha yumşaq idarəetmə təmin edir, mühərrikin həddindən artıq qızmasının və detalların vaxtından əvvəl aşınmasının qarşısını alır.

Qeyd edək ki, müasir avtomobillərdə transmissiya sistemləri daha da təkmilləşdirilib. “E” rejimi ilə yanaşı, performans yönümlü “S” (Sport), aşağı sürətlər üçün nəzərdə tutulan “B” və ya “G” kimi rejimlər, eləcə də sürücüyə əl ilə müdaxilə imkanı verən +/- funksiyaları geniş yayılıb.

Avtomobil mütəxəssisləri sürücülərə tövsiyə edirlər ki, nəqliyyat vasitələrində mövcud olan bu cür funksiyaların təyinatını öyrənmək həm təhlükəsizlik, həm də iqtisadi baxımdan daha düzgün və effektiv sürücülük vərdişlərinin formalaşmasına kömək edir.

Eltac Zülfüqaroğlu