Maşındakı baş dayaqların xilasetmə funksiyası da var - ARAŞDIRMA

Bir çox sürücülər baş dayaqlarının yalnız rahatlıq üçün nəzərdə tutulduğunu düşünür. Lakin avtomobil ekspertlərinin açıqlamalarına görə, bu detallar fövqəladə hallarda həyati əhəmiyyət daşıya bilər.

Avtosfer.az xəbər verir ki, sosial şəbəkələrdə yayılan videoda avtomobillərdəki baş dayaqlarının ikinci dərəcəli, amma çox önəmli bir funksiyası nümayiş etdirilib. Belə ki, baş dayaqları tam çıxarıla bilən şəkildə hazırlanır və onların uclarındakı metal sünbüllər qəza zamanı həyat xilas edə biləcək imkanlar yaradır.

Mütəxəssislərin sözlərinə görə, həmin metal uclar avtomobilin su altında qalması və ya qapıların kilidlənməsi kimi hallarda şüşələri sındırmaq üçün istifadə oluna bilər. Onlar həmçinin qapıları açmaq üçün rıçaq, pəncərələri açıq saxlamaq üçün isə paz rolunu oynaya bilir.

Paylaşılan videoya yüzlərlə sürücü şərh yazaraq, əvvəllər bu gizli funksiyadan xəbərsiz olduqlarını etiraf ediblər. Ekspertlər bildirirlər ki, baş dayaqlarının sünbülləri kiçik sahəyə sıx təzyiq göstərərək şüşəni sındırmaqda, pəncərəni ayaqla təpikləməkdən qat-qat daha effektivdir.

Bununla yanaşı, mütəxəssislər sürücülərə xəbərdarlıq edirlər ki, baş dayaqlarından düzgün istifadə olunmadıqda təhlükə yarana bilər. Onların əsas funksiyası qəfil arxadan toqquşmalar zamanı başın irəli-geri hərəkətini məhdudlaşdırmaq, boyun nahiyəsində ciddi xəsarət riskini azaltmaqdır.

Eltac Zülfüqaroğlu