Maşının panelində yanan bu işıqlar hansı təhlükədən xəbər verir? - İZAH - FOTO

Avtomobilinizin idarəetmə panelindəki simvolların mənalarını bilmək təhlükəsiz sürücülük üçün vacib amillərdən biridir. Bu işarələr təkcə məlumat xarakterli deyil, eyni zamanda potensial qəza və ciddi nasazlıqların qarşısını almağa xidmət edir.

Avtosfer.az xəbər verir ki, mütəxəssislər sürücüləri cihaz panelində yanan bəzi xəbərdarlıq işıqlarına qarşı daha diqqətli olmağa çağırır.

Belə ki, sükan gücləndiricisi ilə bağlı xəbərdarlıq işığı yandıqda, bu, sükanın istənilən anda sərtləşə biləcəyini göstərir. Bu isə idarəetməni çətinləşdirərək qəza riskini artırır.

Əyləc sistemi ilə bağlı işıq isə avtomobilin təhlükəsiz dayanma qabiliyyətinin zəiflədiyini bildirir. Bu halda hərəkəti davam etdirmək ciddi təhlükə yarada bilər.

Mühərrik və ümumi sistem nasazlığına işarə edən xəbərdarlıq işığı isə avtomobilin “beyni”ndə problem olduğunu göstərir. Bu siqnal nəzərə alınmazsa, daha böyük texniki nasazlıqlara səbəb ola bilər.

Dizel mühərrikli avtomobillərdə qızdırma sistemi ilə bağlı xəbərdarlıq işığının hərəkət zamanı yanması isə sistemdə nasazlıq olduğunu göstərir və avtomobilin dayanmasına qədər gedib çıxa bilər.

Eyni zamanda immobilayzer xəbərdarlıq işığı da diqqətdən kənarda qalmamalıdır. Bu işıq yanarsa, avtomobil təhlükəsizlik səbəbilə işə düşməyə və ya hərəkətə icazə verməyə bilər.

Mütəxəssislər bildirir ki, bu cür siqnallar vaxtında nəzərə alınarsa, həm qəza riski azalır, həm də sürücülər əlavə xərclərdən qorunmuş olur.

Eltac Zülfüqaroğlu