Maşınla səs-küy salanlar başqalarını narahat etməkdən zövq alır – MÜTƏXƏSSİS RƏYİ

Səs-küylü səsboğucu sistemləri ilə şəhər küçələrində asayişi pozan sürücülərlə bağlı aparılan yeni araşdırmalar maraqlı nəticələr ortaya qoyub. 

Avtosfer.az xəbər verir ki, tədqiqatçılar bildirirlər ki, bu davranış təkcə avtomobil həvəsi ilə izah olunmur və bəzi hallarda müəyyən psixoloji xüsusiyyətlərlə əlaqəli ola bilər.
529 sürücü (əsasən gənc kişilər) üzərində aparılan araşdırmada yüksək səslə idarəetmə meylinin “Qaranlıq Triada” kimi tanınan şəxsiyyət xüsusiyyətləri – xüsusilə psixopatiya və sadizm göstəriciləri ilə üst-üstə düşdüyü müəyyən edilib. Mütəxəssislərin fikrincə, bəzi sürücülər üçün mühərrikin səsi sadəcə texniki göstərici deyil, diqqət çəkmə və başqalarına təsir vasitəsidir.

Tədqiqatda qeyd olunur ki, yüksək səsli modifikasiyalara üstünlük verən şəxslərdə empatiya səviyyəsinin aşağı olması, qaydalara qarşı etinasızlıq və impulsiv davranış halları daha çox müşahidə edilib. Bəzi hallarda isə başqalarının narahatlığından məmnunluq hissi ilə bağlı meyllər qeydə alınıb.

Ekspertlər vurğulayırlar ki, bütün modifikasiya həvəskarlarını eyni kateqoriyaya aid etmək düzgün deyil. Bununla belə, nəqliyyat vasitəsini qəsdən ictimai asayişi pozacaq şəkildə dəyişdirən şəxslərin psixoloji profilləri ilə riskli və qanunazidd davranışlara meyilli qruplar arasında oxşarlıqların olduğu bildirilir.

Məsələnin ictimai sağlamlıq aspekti də diqqət çəkir. Davamlı səs-küyün stress, yuxu pozuntusu və ümumi həyat keyfiyyətinə mənfi təsiri ilə bağlı çoxsaylı elmi sübutlar mövcuddur. Bu səbəbdən dünyanın bir sıra böyük şəhərləri artıq tədbirlər görməyə başlayıb.

Məsələn, New York küçələrində xüsusi səs-küy nəzarət kameraları – akustik radarlar quraşdırılıb. Bu sistemlər müəyyən edilmiş desibel həddini aşan nəqliyyat vasitələrinin nömrə nişanlarını avtomatik qeydə alır və sürücülərə cərimə tətbiq olunur.

Mütəxəssislər hesab edirlər ki, problem təkcə yol hərəkəti qaydalarının pozulması deyil, həm də şəhər mühitində təhlükəsizlik və həyat keyfiyyəti məsələsidir. Buna görə də səs-küylü egzoz sistemlərinə qarşı nəzarətin gücləndirilməsi və maarifləndirmə tədbirlərinin artırılması vacib sayılır.

Eltac Zülfüqaroğlu