Azərbaycanəsilli sürücünün idarə etdiyi ətir daşıyan yük maşını aşdı - FOTOLAR

Türkiyənin Düzce bölgəsində ətir daşıyan yük maşını aşıb.

Bu barədə Avtosfer.az "Milliyet" nəşrinə istinadən məlumat verir.

Məlumata görə, azərbaycanəsilli Anar adlı şəxsin idarə etdiyi 07-ZB-253 dövlət nömrə nişanlı yük maşını magistralın Ankara istiqamətindəki Gölyaka ərazisində sürücünün idarəetməni itirməsi nəticəsində dəmir arakəsməyə çırpılaraq aşıb.

Sürücü yüngül xəsarətlər alıb. Sağlamlıq qrupları hadisə yerində sürücüyə tibbi yardım göstəriblər.

Jandarm yük maşınından sızan maddənin təhlükəli ola biləcəyindən şübhələnib və vəziyyəti AFAD-a (Türkiyənin Fövqəladə Halların İdarə olunması Agentliyi) bildirib. Düzceyə gedən AFAD qrupları ölçü cihazları ilə araşdırmadan sonra sızan maddənin zərərli olmadığını müəyyən edib və zəruri tədbirlər görüb.

Qəza səbəbindən magistralın hər iki istiqamətində bir zolaq bağlanıb. Yük maşını kranın köməyi ilə çıxarılıb və daha sonra yolda hərəkət normala qayıdıb.