Nasaz avtobusla yola çıxan sürücü qəza törətdi: 14 ölü, 50-dən çox yaralı - FOTO

Keniyada avtobusun iştirakı ilə baş verən yol qəzasında 14 nəfər ölüb, 50-dən çox insan xəsarət alıb. Avtosfer.az xəbər verir ki, hadisə Nakuru-Eldoret magistralında qeydə alınıb. Bu barədə yerli “Nation” nəşri məlumat yayıb.

Hərəkətdə olan avtobusun sürücüsü idarəetməni itirərək minik avtomobilinə çırpılıb. Zərbənin təsirindən avtobus yoldan çıxaraq xəndəyə düşüb.

Hadisə yerinə xeyli sayda polis, təcili tibbi yardım və xilasetmə briqadasının əməkdaşları cəlb edilib.

Sərnişinlərdən biri Roda Atienonun sözlərinə görə, avtobusda bütün səyahət boyu texniki problemlər yaranıb:  “Sərnişinlər sürücüdən avtobusu dəyişdirməyi xahiş ediblər, lakin o, əvəzində avtomobili təmir etmək üçün mexanikin yanına gedib və daha sonra yoluna davam edib” – deyə o, əlavə edib.

Namiq Musayev