Prospektdə “Hyundai” “Mercedes”ə çırpıldı – Təlimçi səbəbi açıqladı - VİDEO

Heydər Əliyev prospektində (“Koroğlu” metrostansiyası istiqamətində) yol-nəqliyyat hadisəsi baş verib.

Avtosfer.az-a görüntüləri sürücülük təlimçisi Arzu Babazadə “WhatsApp” xətti vasitəsilə göndərib.

Məlumata görə, qəza iyulun 21-də səhər saatlarında qeydə alınıb. Belə ki, hərəkətdə olan “Hyundai” markalı avtomobil “Mercedes” markalı nəqliyyat vasitəsi ilə toqquşub. Şahidlərin sözlərinə görə, hadisəyə səbəb sürücülərdən birinin zolaq üzrə düzgün yerləşməmə qaydasını pozması olub.

Nəticədə hər iki avtomobilə maddi ziyan dəyib, xəsarət alan olmayıb.

Qeyd edək ki, qəzaya düşən nəqliyyat vasitələri evakuator vasitəsilə ərazidən kənarlaşdırılıb.

Faktla bağlı araşdırma aparılır.

Sürücülük təlimçisi Arzu Babazadənin sözlərinə görə, qəzanın baş verdiyi ərazidə oxşar hadisələrə tez-tez rast gəlinir. O bildirib  ki, buna səbəb ikinci zolaqda yalnız düz istiqamətdə hərəkətə icazə verən nişanlanma oxunun olmasına baxmayaraq, bəzi sürücülərin həmin zolaqdan sağa dönmələridir. Nəticədə onlar ən sağ zolaqda qanuni şəkildə hərəkət edən avtomobillərlə toqquşurlar. Çünki ən sağ zolaqdan həm düz istiqamətdə, həm də sağa dönməyə icazə verilir.

Təlimçi hesab edir ki, bu cür qayda pozuntularının və qəzaların qarşısını almaq məqsədilə həmin ərazidə yol hərəkətinə nəzarət edən kamera quraşdırılmalıdır.

Nərmin