Yolda şou göstərən sürücü qəza törədib qaçdı; bir nəfər öldü - ANBAAN VİDEO

Bakıda piyadanın ölümü ilə nəticələnən yol-nəqliyyat hadisəsinin görüntüləri yayılıb.

Avtosfer.az xəbər verir ki, bu barədə Daxili İşlər Nazirliyinin (DİN) Nəqliyyatı İntellektual İdarəetmə Mərkəzi (NİİM) paylaşım edib.

Bildirilib ki, manevretmə qaydalarının pozulması nəticəsində baş verən yol-nəqliyyat hadisəsi bir nəfərin ölümü ilə nəticələnib.

Qeyd olunub ki, manevretmə qaydalarının pozulması qəza riskini artırır, nəticədə ölən və xəsarət alanlar olur. Xüsusilə dönmə və zolaq dəyişmə zamanı təhlükəsizlik tədbirlərinə əməl edilməməsi, eləcə də işıq siqnallarından istifadə olunmaması ağır qəzalara səbəb ola bilər.

Mərkəzdən vurğulanıb ki, bəzi sürücülər dönərkən və ya zolaq dəyişərkən işıq siqnalını yandırmaqla üstünlüyün onlarda olduğunu düşünürlər. Lakin bu, digər hərəkət iştirakçılarına qarşı təhlükəsizlik öhdəliyini aradan qaldırmır.

NİİM sürücüləri məsuliyyətli davranmağa və manevr edərkən yol hərəkəti qaydalarına ciddi əməl etməyə çağırıb.