Artıq bu şəxslər əlavə təhsilhaqqını özləri ödəyəcək

Sosial müdafiəyə xüsusi ehtiyacı olan şəxslərin Azərbaycan Respublikasının təhsil müəssisələrində ödənişli əsaslarla aldıqları əsas təhsilin (əlavə təhsil istisna olmaqla) haqqı dövlət büdcəsi hesabına ödəniləcək.

Avtosfer.az-ın məlumatına görə, bu məsələ Milli Məclisin Elm və təhsil komitəsinin bu gün keçirilən iclasında müzakirəyə çıxarılan “Təhsil haqqında” Qanuna dəyişiklik layihəsində əksini tapıb.

Qeyd olunub ki, mövcud qanunvericiliyə əsasən, sosial müdafiəyə xüsusi ehtiyacı olan şəxslər təhsil müəssisələrində ödənişli əsaslarla təhsil aldıqları dövrdə onların təhsil haqları dövlət vəsaiti hesabına qarşılanır.

Eyni zamanda bildirilib ki, Nazirlər Kabinetinin təsdiqlədiyi “Əlavə təhsilin məzmunu, təşkili və əlavə təhsil üzrə sənədlərin verilməsi Qaydası”na uyğun olaraq yenidənhazırlanma, ikinci ali və orta ixtisas təhsili, yüksək texniki peşə təhsili, ixtisas dərəcələrinin artırılması və yaşlıların təhsili yalnız ödənişli əsaslarla həyata keçirilir. Bu xərclər ya müvafiq təşkilat, ya da təhsil alan şəxsin özü tərəfindən ödənilir.

Beləliklə, sosial müdafiəyə xüsusi ehtiyacı olan şəxslər üçün əlavə təhsil növləri də ödənişli hesab olunur və bu istiqamətdə dövlət büdcəsindən maliyyə ayrılması nəzərdə tutulmur.

Qeyd edilən ziddiyyətlərin aradan qaldırılması məqsədilə “Təhsil haqqında” Qanunda dəqiqləşdirici dəyişikliklərin edilməsi təklif olunur.

Könül Rauf