Avropada minlərlə insanı öldürdü, Bakıya da çatdı – Bu saatlarda çölə çıxmayın!

İyun ayında Avropada müşahidə olunan rekord istilər 27 ölkədə 10 650-dən çox insanın ölümünə səbəb olub. Bildirilir ki, həyatını itirənlərin əksəriyyəti 65 yaşdan yuxarı şəxslərdir. Mütəxəssislərin fikrincə, ekstremal temperatur ürək-damar, eləcə də tənəffüs sistemi xəstəliklərini ağırlaşdırır. Azərbaycanda da son günlər, xüsusilə Bakıda havanın temperaturu yüksəkdir.

Ölkəmizdə də belə isti hava sağlamlıq üçün ciddi təhlükə yarada bilərmi? Hansı insanlar daha çox risk altındadır və özümüzü necə qorumalıyıq?

Avtosfer.az bildirir ki, Globalinfo.az-a danışan funksional tibb mütəxəssisi, terapevt Sevinc Musayeva deyib ki, Avropada rekord istilər ekstremal hava şəraitinin xüsusilə yaşlılar və xroniki xəstələr üçün ciddi risk yaratdığını göstərir:

“Azərbaycanda, xüsusilə Bakıda uzunmüddətli yüksək temperatur, rütubət və gecə sərinliyinin olmaması susuzlaşma, təzyiq dəyişiklikləri, ürək ritm pozğunluqları və mövcud xəstəliklərin ağırlaşmasına səbəb ola bilər. Risk qrupuna 65 yaşdan yuxarı şəxslər, uşaqlar, hamilələr, ürək, ağciyər, böyrək və diabet xəstələri, həmçinin açıq havada çalışanlar daxildir”.

Terapevt bildirib ki, insanlar saat 11:00-17:00 aralığında açıq havada qalmağı mümkün qədər məhdudlaşdırmalıdırlar:

“Gün ərzində müntəzəm su içmək, ağır fiziki fəaliyyəti səhər yaxud axşam saatlarına keçirmək, həmçinin yüngül və açıq rəngli geyimlərə üstünlük vermək tövsiyə olunur. Xroniki xəstəlikləri olan şəxslər isə qəbul etdikləri dərmanların rejimini dəyişməməli, maye qəbulu ilə bağlı hər hansı məhdudiyyət olduqda həkim tövsiyələrinə əməl etməlidirlər”.