Bir meyit başı üçün 7650 manat ödənilir - VİDEO

Tanınmış həkim Əliosman Qədimbəyli sosial şəbəkədə etdiyi paylaşımla diqqət çəkib. Avtosfer.az Milli.az-a istinadla xəbər verir ki, həkim İstanbulda yerləşən Mərmərə Universitetinin Əməliyyat və təlim mərkəzindən görüntülər yayımlayıb. O bildirib ki, burada müxtəlif ölkələrdən gələn mütəxəssislərin iştirakı ilə tibbi təlimlər və praktiki məşğələlər keçirilir. Qədimbəylinin sözlərinə görə, tədris prosesində Avropanın müxtəlif bölgələrindən gətirilən anatomik materiallardan istifadə olunur. Həkim baş və boyun nahiyəsi üzrə aparılan təlimlər üçün bir anatomik preparata görə 4500 dollar (7650 manat) ödənildiyini qeyd edib. O vurğulayıb ki, proqramda müxtəlif ölkələrdən gələn həkimlər iştirak edir və burada tibbin ən son yenilikləri, müasir cərrahi üsullar və yeni texnologiyalar tətbiq olunur. Paylaşılan görüntülər sosial şəbəkələrdə maraqla qarşılanıb. İzləyicilər təlim prosesinin əhəmiyyəti və tibb sahəsindəki yeniliklərlə bağlı müxtəlif fikirlər səsləndiriblər.