Müəyyən səviyyədə problem hələ də qalır - İşsizlərin sayı açıqlandı

"Azərbaycanda hələ də müəyyən səviyyədə işsizlik problemi qalmaqdadır". Avtosfer.az xəbər verir ki, bunu Qaynarinfo-ya açıqlamasında iqtisadçı ekspert Akif Nəsirli 2026-ci ildə ölkədə işsizlərin sayını göstərən statistikadan danışarkən deyib. 

Ekspertin sözlərinə görə, belə statistik göstəricilər hökumətin məşğulluq proqramlarını, yeni iş yerlərinin yaradılması siyasətini və iqtisadi inkişaf strategiyalarını daha dəqiq planlaşdırmasına kömək edir:

"Parlamentdə bu cür hesabatların müzakirəsi həm hökumətin fəaliyyətinə nəzarət baxımından əhəmiyyətlidir, həm də deputatların müxtəlif sahələr üzrə problemləri qaldırmasına imkan yaradır. Belə müzakirələr nəticəsində məşğulluğun artırılması, regionlarda iş yerlərinin yaradılması və gənclərin əmək bazarına inteqrasiyası ilə bağlı yeni təkliflər irəli sürülə bilər".

Ekspert bildirib ki, ümumilikdə bu cür məlumatlar ölkənin sosial-iqtisadi vəziyyətini anlamaq və gələcəkdə işsizliyin azaldılması üçün daha effektiv addımlar atmaq baxımından vacib hesab olunur.

Akif Nəsirli hesab edir ki, Nazirlər Kabineti tərəfindən təqdim edilən və Milli Məclisdə müzakirə olunan hesabat ölkədə əmək bazarının vəziyyətini göstərən mühüm sənədlərdən biridir:

"Hesabatda işsizlərin sayının göstərilməsi iqtisadi və sosial siyasətin nəticələrini qiymətləndirmək üçün vacib məlumat sayılır".

Qeyd edək ki, Milli Məclisin plenar iclasında müzakirəyə çıxarılan Nazirlər Kabinetinin 2025-ci ildə fəaliyyəti haqqında hesabatında Azərbaycanda işsizlərin sayı açıqlayıb. Hesabata görə, ötən il ölkədə işsizlərin sayı 279, 1 min nəfər olub.