Naxçıvanın muxtar statusu ləğv edilir - CİDDİ HADİSƏ

Ölkəmizdə ciddi hadisə baş verdi – qəbul edilmiş yeni qanunlara, Naxçıvan Muxtar Respublikasının Konstitusiyasına edilmiş dəyişikliklərə görə, Naxçıvanın muxtariyyəti “de-fakto” ləğv edildi. Növbəti addım kimi, çox güman, Azərbaycan Konstitusiyasına da dəyişikliklər etmək lazım olacaq – bunun üçün referendum lazımdır.

Avtosfer.az xəbər verir ki, bu sözləri ReAL Partiyasının sədri Natiq Cəfərli qeyd edib.

O bildirib ki, referenduma tək Naxçıvanın muxtar statusunun “de-yure” ləğvi deyil, həm də İcra Hakimiyyəti institutunun ləğvi, bələdiyyələrin səlahiyyət və məsuliyyətinin artırılması ilə yerli özünüidarə institutlarının gücləndirilməsi, proporsional seçkiyə keçid, Milli Məclisin hökumət üzərində nəzarətinin artırılması, ölkəmizin inzibati-ərazi quruluşunun dəyişdirilməsi – yəni, Prezidentin fərmanı ilə yaradılmış 14 iqtisadi rayonun (Qarabağ, Şərqi Zəngəzur, Naxçıvan və s. kimi) inzibati ərazi vahidinə çevrilməsi, Prezidentin şəxsi nümayəndəliyi institutunun gücləndirilməsi və iqtisadi inkişafa səbəb olacaq bir neçə başqa dəyişikliklər də qəbul edilsə, çox yaxşı olardı./axar.az