Süni intellekt və təhsil: Gələcəyin müəllimi kim olacaq? - Eskpert AÇIQLADI

Süni intellekt son illərdə həyatımızın bir çox sahəsinə sürətlə daxil olub və təhsil də bu sahələrdən biridir. Texnologiyanın inkişafı ilə birlikdə öyrənmə üsulları dəyişir, yeni imkanlar yaranır və müəllimlik peşəsinin gələcəyi ilə bağlı müxtəlif suallar ortaya çıxır. Xüsusilə süni intellektin tədris prosesində rolu, şagirdlərlə münasibəti və bilik ötürmə qabiliyyəti haqqında müzakirələr getdikcə daha da aktuallaşır. Bu mövzu həm müəllimlər, həm şagirdlər, həm də cəmiyyət üçün maraqlı və düşündürücü məsələlərdən birinə çevrilib.
Mövzu ilə əlaqədar təhsil eksperti Elçin Əfəndi Avtosfer.az-a açıqlamasında bildirib ki, süni zəkanın müəllim olaraq tədris prosesini icra etməsi əlbəttə mümkündür və bunu biz yəqin ki, gələcək illərdə görəcəyik:

“Düzdür, hal-hazırda dünyanın inkişaf etmiş, texnologiya sahəsində irəliləmiş ölkələrində artıq süni zəkadan tədris prosesində geniş istifadə olunur. Hətta bəzi yerlərdə auditoriyaları süni zəka olmadan təsəvvür etmək mümkün deyil. Ölkəmizdə isə yəqin ki, qarşıdakı 5–10 il ərzində tam süni zəka əsaslı tədris prosesini idarə edən robotları və ya müvafiq ən yeni texnologiyaları görə biləcəyik. Müəyyən qiymətləndirmənin aparılması, tədris prosesinin vizual olaraq təqdimatı, şagirdlər üçün daha əlçatan informasiyanın verilməsi kimi məsələlərdə süni zəka mühüm rol oynayacaq. Amma yenə də canlı insan funksiyasını tam əvəz etmək mümkün deyil. Məsələn, qiymətləndirmə zamanı şagirdin mimikalarına əsasən onun hazırlıqlı olub-olmadığını müəyyən etmək süni zəka üçün xarakterik deyil. Buna görə də biz təbii ki, canlı müəllimi süni zəka ilə tam əvəz olunmuş şəkildə təsəvvür edə bilmərik. Lakin informasiyanın daha əlçatan formada təqdim edilməsi və daha rahat ötürülməsi kimi məsələlərdə süni zəka, şübhəsiz ki, ön plana çıxır”.
Nurcan Babək