Taksi və nəqliyyat qiymətləri ilə bağlı VACİB AÇIQLAMA: Qiymətlər bu halda yüksələ bilər...

Son günlər paytaxtda taksi xidmətlərindən istifadə edən vətəndaşlar qiymətlərin artdığını müşahidə edirlər. Taksidə qiymətlərin yüksəlməsi fonunda, ictimai nəqliyyatda dəyişiklik olmaması diqqət çəkir.

Mövzu ilə bağlı nəqliyyat eksperti Eldəniz Cəfərov açıqlama verib.

Onun sözlərinə görə, taksi xidmətlərində qiymətlərin formalaşması bazar mexanizminə əsaslanır:
“Taksi qiymətləri dəyişən tarifdir. Bu, tələb-təklif əsasında formalaşır. Tövsiyə edilən qiymət olsa da, bu, əsasən günün saatlarına görə dəyişir. Yəni tıxacların çox olduğu vaxtlarda və ya sərnişin sayının artdığı pik saatlarda qiymətlər yüksəlir”.

Ekspert bildirib ki, ictimai nəqliyyatda isə vəziyyət tam fərqlidir:
“İctimai nəqliyyatda qiymətlər dövlət tərəfindən Tarif Şurası vasitəsilə tənzimlənir. Hazırda müvafiq qurumlar tərəfindən bu istiqamətdə hər hansı qiymət dəyişikliyi ilə bağlı qərar mövcud deyil”.

E.Cəfərov gələcəkdə ictimai nəqliyyatda müxtəlif qiymət siyasətlərinin tətbiq oluna biləcəyini də istisna etmir:
“Tariflər indiki kimi sabit qala bilər, eyni zamanda differensiallaşdırılmış sistemin də tətbiqi mümkündür. Bu, ictimai nəqliyyatın növünə, məsafəyə və hətta sutkanın saatlarına görə dəyişə bilər”.