Dinlənilməsi mümkün olmayan smartfon buraxıldı - FOTO

İsveçrənin “Goldvish” şirkəti lüks kateqoriyadan olan “Eclipse” smartfonlarının təqdimatını keçirib. İKT.lent.az-ın “korrespondent.net” saytına istinadən verdiyi məlumata görə, bu smartfonların dinlənilməsi mümkün deyil. Xüsusi şifrələmə texnologiyası smartfon sahibini kənar “qulaq”lardan qoruyur. Lakin müdafiə mexanizmi o vaxt keçərli olur ki, digər həmsöhbət də eyni cihazdan istifadə etsin. Smartfon güclü dördnüvəli “Qualcomm Snapdragon” prosessoru ilə təchiz olunub. 65 Gb operativ yaddaş və 5,5 düymlük böyük displeyə, 13 Mp əsas kamera və 5 Mp frontal kameraya malikdir. “Eclipse”in dizaynında ekzotik dəri və qiymətli metaldan istifadə olunub. Bütün zahiri görkəm əllə hazırlanıb.

Smartfonun qiyməti 7,7 min dollardır.