"Belə vəziyyətdə küçələr yenidən taksi ilə dolacaq, xaos yaranacaq" - Elməddin Muradlı

Azərbaycan Yerüstü Nəqliyyat Agentliyinin (AYNA) qərarına əsasən, taksi sürücüləri sərnişinləri Sumqayıt şəhərinə apara bilsələr də, oradan Bakı istiqamətində sərnişin götürə bilməzlər. 

Mövzu ilə bağlı nəqliyyat eksperti Elməddin Muradlı bildirdi ki, bu, qanunvericiliyin tələbidir və AYNA tərəfindən edilən müraciətdə hər hansı qanunsuz məqam yoxdur.

Ekspert əlavə etdi ki,  Bakı şəhəri üzrə taksi fəaliyyəti üçün konkret limit müəyyənləşdirilib:

"Hazırda təxminən 41 min taksi qeydiyyatdan keçmiş olsa da, Bakı üzrə nəzərdə tutulan kvota 25 mindir. Yəni paytaxtda maksimum 25 min taksi fəaliyyət göstərməlidir. Əgər Sumqayıtda, Abşeronda, Hacıqabulda, Gəncədə və ya digər bölgələrdə qeydiyyatdan keçmiş taksilər gəlib Bakıda fəaliyyət göstərəcəksə, bu halda taksi sahəsində aparılan islahatların effekti sual altına düşər. Belə vəziyyətdə küçələr yenidən taksi ilə dolacaq, xaos yaranacaq və mövcud problemlər aradan qalxmayacaq. Bu baxımdan tənzimləyici qurumun atdığı addım qanuna əsaslanır və məntiqidir. Bununla belə, müəyyən detallar var ki, onlara yenidən baxılması məqsədəuyğun olar. Xüsusilə taksi buraxılış kartı olan, lakin avtomobili köhnəldiyi üçün onu yenilədikdən sonra fəaliyyətini davam etdirməkdə çətinliklə üzləşən şəxslərə münasibətdə daha çevik və fərdi yanaşmanın tətbiqi vacibdir. Bu kimi hallarda balanslı və sosial həssas qərarların qəbul edilməsi daha düzgün olar"./redaktor.az