Ekspert: Bakıya 35 min taksi bəs edir

Yazarlar 29 Yanvar 2025 16:53

WhatsApp kanalımıza abunə ola bilərsiniz

Avtobuslarla 2024-cü ildə 28 milyon olmaqla, 2023-2024-cü illərdə 41 milyon əlavə sərnişin, dəmir yolu və metro ilə 11 milyondan çox əlavə sərnişin daşınıb.

Bunu Yerüstü Nəqliyyat Agentliyinin İdarə Heyətinin sədri Anar Rzayev nəqliyyat məsələlərinə həsr olunmuş müşavirədə Prezident İlham Əliyevə məruzəsində bildirib.

"Taksi daşımalarında isə 32 faizlik enmə baş vermişdir. Eyni zamanda, 2024-cü ilin son aylarında yaradılmış mikromobillik şəbəkəsi və mikromobillik xidmətində 700 mindən çox səfər həyata keçirilmişdir. Bu da tədbirlərin trendinin dəyişməsinin və bizim istədiyimiz istiqamətdə getməsinin göstəricisidir", - deyə o, əlavə edib.

Rəqəmsal inkişaf və nəqliyyat naziri Rəşad Nəbiyev isə bildirib ki, islahatlar nəticəsində taksilərin sayı 67 mindən 30 minə, taksilərin orta yaşı isə 15-dən 8-ə endirilib:

"Ən başlıcası isə şəhər mərkəzinə doğru sıxlıq yaradan qısa məsafəyə səfərlərin sayı kəskin azalmışdır, təxminən 32 faiz. Avtomobil yönümlü şəhərlərin insan yönümlü şəhərlərə keçidi məqsədilə atılan digər mühüm addım parklar və yaşıl dəhlizlərin yaradılması ilə bağlıdır. Xaqani bağının ərazisi yan yollar hesabına genişləndirilmiş, metronun "28 May" stansiyası ətrafında isə park konseptli hab yaradılmışdır. İçərişəhərə və Əziz Əliyev küçəsinə giriş məhdudlaşdırılmışdır".

Nəqliyyat eksperti Elməddin Muradlı bildirib ki, azalmanın əsas səbəbi taksilərlə bağlı il məhdudiyyətinin tətbiq edilməsidir:

“Yəni köhnə maşınlar artıq taksiyə yaramır və sistem onu bloklayır. Sözügedən səbəbdən də azalma baş verdi. Bu təbii bir prosesdir. Çünki dövlətin qoyduğu qaydalara əməl etmək lazımdır. Ümumiyyətlə taksilərin sayı azalanda biz gördük ki, nə qədər köhnə, yararsız avtomobil taksidə istismar olunurmuş. Amma indi şirkətlər bu işin üstünə düşüblər və çoxlu yeni maşınlar gətirirlər, Hətta Çin istehsalı olan elektrik və hibrid avtomobillərinə üstünlük verirlər. Bir ara Hacıqabulda istehsal olunan avtomobillərə də maraq artmışdı. Sadəcə o avtomobillər, benzinlə işləyir deyə sürücülərə sərfəli deyil. Onlar da alıb qaz balonu quraşdırırlar və bu da başqa fəsadlar yaradır. Ümumən gözləyirik ki, Bakıda 35 min taksi olacaq və bu da kifayət edir”.

(sherg.az)

Oxunub : 826