Elektrik avtomobillərinin ən böyük problemi nədir? - AÇIQLAMA

Elektrikli avtomobillərlə bağlı ictimaiyyətdə formalaşan fikirlərdən biri onların şarj məntəqələrinin azlığıdır.

Bəs əslində elektrikli maşınların qarşısındakı ən böyük maneə nədir?

Avtosfer.az-ın məlumatına görə, nəqliyyat məsələləri üzrə ekspert Yasin Mustafayev "Konkret.az"a açıqlamasında bildirib ki, əsas problem şarj yerlərinin azlığı ilə məhdudlaşmır.

Ekspertin sözlərinə görə, elektrikli nəqliyyat vasitələrinin qarşısındakı daha ciddi maneə servis və ehtiyat hissələri ilə bağlıdır:

“Bu sahədə müəyyən miflər dolaşır. Deyirlər ki, elektrikli avtomobillər xarab olduqda təmir edilmir, ehtiyat hissələri tapılmır, ustalar azdır. Əslində isə belə deyil. Bu avtomobillər daxili yanma mühərrikli nəqliyyat vasitələri ilə müqayisədə daha sadə quruluşa malikdir. Daxili yanma mühərriklərində minlərlə hissə var, elektrikli avtomobillərdə isə əsasən mühərrik sarğı və valdan ibarətdir. Bu da onların istismarını həm asanlaşdırır, həm də daha uzunömürlü edir”.

Yasin Mustafayev bildirib ki, bir çox istehsalçılar elektrik mühərriklərinə ömürlük zəmanət verirlər:

“Bu da o deməkdir ki, ciddi nasazlıq ehtimalı yoxdur. Elektrikli avtomobillərin ikinci önəmli komponenti isə akkumulyatordur. Akkumulyatorların utilizasiyası və ya təmiri məsələsi isə hələ yeni bir anlayışdır, amma bu sahədə də inkişaf müşahidə olunur”.

Ekspert həmçinin qeyd edib ki, artıq bir çox servis mərkəzlərində və ehtiyat hissələri dükanlarında elektrikli avtomobillərlə bağlı xidmətlərin göstərilməsi genişlənməkdədir:

“İnsanlar bu avtomobillərdən çəkinməməlidir. Artıq bu, gələcəyin nəqliyyatıdır. Ekoloji, iqtisadi və komfort baxımından bu maşınlar daha sərfəlidir. Qiymət baxımından da münasibdir. Üstəlik, eyni məsafəni daxili yanma mühərriki ilə qət etməklə müqayisədə, elektrikli avtomobillərlə 70-80 faiz daha az xərcə getmək mümkündür. Proses artıq geri dönüşsüzdür və bu sahədəki miflərin zamanla aradan qalxacağı gözlənilir”.