Piyadaların təhlükəsizliyi nə dərəcədə qorunur? - Ekspertdən AÇIQLAMA - FOTO

Şəhərlərdə və nəqliyyatın sıx olduğu bölgələrdə piyadaların təhlükəsizliyi hər zaman aktual mövzulardan biridir. Yol hərəkəti qaydalarına riayət edilmədikdə və ya infrastruktur lazımi səviyyədə olmadıqda piyadalar üçün təhlükə daha da artır. 

Xüsusilə, işıqforlarla tənzimlənməyən və ya zəif işıqlandırılan keçidlərdə risk daha böyükdür.

Bəs piyadalar üçün keçidlər kifayət qədər təhlükəsizdirmi?

Mövzu ilə bağlı yol hərəkəti qaydaları üzrə ekspert Elməddin Muradlı Avtosfer.az-a açıqlamasında bildirib ki, piyadalar üçün keçidlərin təhlükəsizliyi bu gün heç də ürəkaçan vəziyyətdə deyil:

“Prezident İlham Əliyev tərəfindən təsdiqlənmiş Bakı şəhəri və ətraf ərazilərinin nəqliyyat infrastrukturu ilə bağlı dövlət proqramında bu məsələyə xüsusi diqqət yetirilib. Proqramda piyada keçidlərində eskalatorların, liftlərin vəziyyətinin yoxlanılması və mövcud şəraitin nəzərdən keçirilməsi qeyd olunub.

Piyadalar üçün normal əlçatan şərait yaradılmalıdır. Mövcud problemlərin öz həllini tapacağı gözlənilsə də hazırkı vəziyyətdə bu problemlərin hələ də mövcud olduğu açıq-aydın görünür. Bəzi yerlərdə keçidlərin hərəkət üçün əlverişsiz olması, keçidlər arasındakı məsafənin uzaqlığı, bəzi ərazilərdə ümumiyyətlə keçidlərin olmaması insanları yolun hərəkət hissəsinə çıxmağa məcbur edir ki, bu da onların həyatını təhlükəyə atır. Bu baxımdan, mövcud qanunvericiliyə və dövlət proqramına əsaslanaraq problemləri təhlil edib aradan qaldırmaq vacibdir”.

Ekspert əlavə olaraq qeyd edib ki, əgər piyadalar üçün normal şərait və infrastrukturu ən yüksək səviyyədə təşkil edilərsə, piyadavurma hadisələrinin sayında azalma müşahidə oluna bilər:

“Hazırda Azərbaycanda qeydə alınan ölümlə nəticələnən yol-nəqliyyat hadisələrinin təxminən 50%-i piyadaların iştirakı ilə baş verir. Statistikaya görə, hər il yol qəzalarında təxminən 800 nəfər dünyasını dəyişirsə, bunun 400-ə yaxını piyadalardır. Əgər bu vəziyyət dəyişərsə, Azərbaycan yol-nəqliyyat hadisələri baxımından inkişaf etmiş ölkələr sırasında yer ala bilər”.

Eltac Zülfüqaroğlu