Yol polisi nömrəsini itirən sürücüyə belə kömək etdi – TAPILDI - FOTO

Jurnalist Əziz Orucovun rayona səfəri zamanı maraqlı hadisə yaşanıb. O, ailəsi ilə birlikdə Bərdə rayonuna gedərkən avtomobilinin dövlət qeydiyyat nişanlarından birinin yolda itdiyini son anda öyrənib.
Avtosfer.az xəbər verir ki, Əziz Orucovun sözlərinə görə, hərəkətdə olarkən başqa bir sürücü ona işarə edərək avtomobilin ön dövlət nömrə nişanının yerində olmadığını bildirib. Bundan sonra o, avtomobili saxlayaraq vəziyyəti yoxlayıb və ön nömrə nişanının itdiyini müəyyən edib.
Hadisə zamanı Yevlax postuna (BDYPİ YPXA-nın 8-ci tağımı) yaxın ərazidə olan jurnalist dərhal posta müraciət edib və baş verənlə bağlı məlumat verib. Onun sözlərinə görə, polis əməkdaşları məsələyə operativ şəkildə reaksiya verərək nömrə nişanının son dəfə hansı ərazidə avtomobilin üzərində olduğunu müəyyənləşdiriblər. Daha sonra yol polisi əməkdaşları Əziz Orucovla birlikdə həmin istiqamətdə axtarış aparıblar. Qısa müddətdən sonra itmiş dövlət qeydiyyat nişanı tapılıb. Polis əməkdaşları nömrə nişanının yenidən avtomobilə bərkidilməsində də sürücüyə köməklik göstəriblər.
Jurnalist yaşadığı hadisə ilə bağlı sosial şəbəkə hesabında paylaşım edərək Yevlax DYP postunun komandiri Aqil müəllimə və ona dəstək göstərən bütün əməkdaşlara təşəkkürünü bildirib.

Eltac