Amalın anası Prezident İlham Əliyevə müraciət etdi: “GÜNAHKAR CƏZASINI ALSIN” - VİDEO

Ötən il "Arzum 999" ləqəbi ilə tanınan bloger İlduzə Hacıyevanın iştirakı ilə baş verən qəza nəticəsində oğlu Amal Məlikovu itirən Meri Veynq Azərbaycan Respublikasının Prezidentinə, həmçinin Birinci vitse-prezident Mehriban Əliyevaya və Leyla Əliyevaya müraciət ünvanlayıb.

Avtosfer.az xəbər verir ki, Meri Veynq videomüraciətində qəzanı törədən şəxsin hüquq-mühafizə orqanlarından gizləndiyini və ölkəni tərk etdiyini bildirib. O qeyd edib ki, təqsirli şəxs əvvəlcə həbs edilsə də, sonradan apellyasiya məhkəməsinin davam etdiyi müddətdə ev dustaqlığına buraxılıb.

Meri Veynin sözlərinə görə, səhhətindəki problemlər səbəbindən məhkəmə proseslərində iştirak edə bilməyib. Bu səbəbdən, övladının ölümündə günahkar olan şəxsin layiqli cəzasını alması üçün Prezidentdən məsələnin nəzarətə götürülməsini xahiş edib.

Qeyd edək ki, hadisə ötən ilin iyununda Mərdəkan qəsəbəsində baş verib. Gecə yarısı “Changan” markalı avtomobili idarə edən Arzum sola dönmə manevri edərkən arxadan gələn “Mercedes”lə yandan toqquşub. Nəticədə “Mercedes” idarəetmədən çıxaraq maneəyə çırpılıb və bir neçə dəfə aşıb. Qəza nəticəsində avtomobilin sürücüsü- 29 yaşlı Amal Məlikov hadisə yerində ölüb, həyat yoldaşı Sənubər Muradova isə ağır xəsarət alıb.

Açılan cinayət işinə əsasən, İ.Hacıyeva 5 il 2 ay müddətinə azadlıqdan məhrum edilib. Hökm elan edildikdən dərhal sonra o, məhkəmə zalında həbs olunaraq cəzasını çəkmək üçün ümumi rejimli cəzaçəkmə müəssisəsinə göndərilib.

İyulun 22-də isə apellyasiya məhkəməsi keçirilib və İlduzə Hacıyeva ev dustaqlığına buraxılıb.