Bu yolda qaydalar kütləvi şəkildə pozulur: NƏZARƏT YOXDUR? - VİDEO

Paytaxtın mərkəzində sürücülər hər gün qaydaları kütləvi şəkildə pozurlar. Avtosfer.az xəbər verir ki, söhbət Neftçilər prospektindən gedir.

Belə ki, Azneft dairəsindən üzü Qız Qalası istiqamətinə olan hissədə sürücülər sıxlıq zamanı avtobus zolağı ilə hərəkət edirlər. Adi avtomobillərlə yanaşı bu zolağa operativ nəqliyyat vasitələri də daxil olur. Qeydə alınmış videoda polis əməkdaşının sayrışan işıq və xüsusi səs siqnalını qoşmadan avtobus zolağına daxil olması da əks olunub.

Qanunvericiliyə görə, operativ nəqliyyat vasitələrinin sürücüləri qanunun tələblərindən kənara yalnız xidməti zərurətlə bağlı çıxa bilərlər. Bu zaman sayrışan işıq və xüsusi səs siqnalı işlək vəziyyətdə olmalıdır. Hamının tıxacda gözlədiyi vaxtda bu qədər sürücünün ayrıseçkilik edərək avtobus zolağında şütüməsi ikrah hissi yaradır. Əgər burada qaydalar kütləvi şəkildə pozulursa və buna nəzarət yoxdursa avtobus zolağının olmasına nə ehtiyac var? Yaxşı olardı ki, həmin zolaq yolun əks tərəfindəki kimi ləğv edilərək bütün nəqliyyat vasitələrinin istifadəsinə verilsin.

Könül Rauf