Olimpiya Stadionunun ətrafına giriş bu səbəbdən bağlanıbmış - Təlimçi AÇIQLADI - VİDEO

Paytaxtın Heydər Əliyev prospekti, Bakı Olimpiya Stadionunun ətrafındakı yollar yenidən açılıb.

Avtosfer.az-ın məlumatına görə, bu barədə sürücülük təlimçisi Arzu Babazadə video çəkərək ətraflı məlumat verib. O bildirib ki, stadionun ətrafına girişin qadağan edilməsinə səbəb təlimçilərdən birinin ərazidə qəza törədərək hadisədən yayınması olub: “Bakı Olimpiya Stadionun ərazisinin bağlanma səbəbi təlimçilərdən birinin idarə etdiyi avtomobili işıq dirəyinə çırpması və hadisə yerindən yayınması olub. Təbii ki, o, törətdiyi qəzanı gizlətmək istəsə də bu cəhdi uğursuzluqla nəticələnib. Çünki hadisədən sonra avtomobilindən düşərək ona nəzər yetirib və bu vaxt sürücünün siması ərazidəki təhlükəsizlik kamerasına düşüb. Nəticədə o, müəyyən olunaraq məsuliyyətə cəlb edilib”.

Təlimçi stadionun ətrafına girişlə bağlı ərazi üzrə rəhbərliyə müraciət etdiklərini və bu müraciətimizin müsbət nəticələndiyini əlavə edib: “Məsələylə bağlı Bakı Olimpiya Stadionunun rəhbər heyətinə və mətbuat xidmətinə müraciət etdik. Müraciətimizin stadionun rəhbərliyi və mətbuat katibi Fərid Əsədzadə tərəfindən müsbət dəyərləndirildiyi üçün onlara təşəkkürümü bildirirəm. Hətta mən stadionu ödənişli olaraq açmalarını və bununla əlaqədar müqavilə bağlanılmasını təklif etdim. Lakin onlar mənim bu təklifimi qəbul etmədilər və cəmiyyətə faydalı sürücülər yetişdirməyimi əsas gətirərək stadionun ətrafına giriş etməyimə bugündən etibarən icazə verdilər”.

Arzu Babazadə məsələylə bağlı ona yardım edən Avtosfer.az saytının rəhbəri Elməddin Muradlıya və hüquqşünas Ərşad Hüseynova təşəkkürünü bildirib. 

Nərmin