Skuterlə təhlükə yaradan azyaşlının valideynləri bölməyə çağırıldı - VİDEO

DİN-in Mətbuat Xidmətinin əməkdaşı Lumu İsrəfilli Avtosfer.az-a bildirib ki, Sumqayıt şəhərində azyaşlı qızın avtomobil yolunda skuter idarə etməsi ilə bağlı yayılan görüntülər polis əməkdaşları tərəfindən araşdırılıb. Həmin uşaq valideynləri ilə birgə Sumqayıt Şəhər Polis İdarəsinə dəvət olunaraq profilaktik söhbətlər aparılıb. Azyaşlının yol hərəkətində nəzarətsiz iştirakına icazə verilməməsi, həmçinin belə addımların yarada biləcəyi təhlükə valideynlərinin diqqətinə çatdırılıb.

*** 1 aprel, 15:30

Sumqayıt şəhəri, 20 Yanvar küçəsində azyaşlı qızın yolda təhlükəli hərəkəti kameraya düşüb. İzləyicilərdən biri Avtosfer.az-ın “Whatsapp” ünvanına videomaterial göndərib. Hadisə aprelin 1-də səhər saatlarında baş verib.

Kadrlardan görünür ki, azyaşlı uşaqlar üçün nəzərdə tutulmuş skuteri yolda hərəkətdə olan avtomobillərə əhəmiyyət vermədən idarə edib. Belə ki, skuterlə nizamsız hərəkət edən uşaq geriyə manevr edən avtomobilə qəza şəraiti yaradıb. Nəticədə o, həm özünün, həm də sürücülərin təhlükəsizliyini risk altına qoyub.

Qeyd edək ki, qanunvericiliyə əsasən, azyaşlıların yol hərəkətində nəzarətsiz iştirakı valideynlərin məsuliyyətinə aiddir. Belə hallarda valideynlər uşaqlarını yol hərəkəti qaydalarına uyğun davranmağa yönəltməli və təhlükəsizliyini təmin etməlidirlər.

Nərmin