Vətəndaş sürmədiyi avtomobili texniki baxışdan keçirmədiyinə görə cərimələnə bilməz – ƏRŞAD HÜSEYNOV AÇIQLADI - FOTO

Sosial şəbəkələrdə bəzi sürücülər istifadə etmədikləri avtomobili texniki baxışdan keçirmədiklərinə görə cərimələnmələri ilə bağlı məlumat paylaşırlar.

Avtosfer.az saytına müraciət edən izləyicilərdən biri maraqlı halı diqqətə çatdırıb. O bildirib ki, avtomobilini uzun müddətdir ki, qarajda saxlayır, istifadə etmir. Amma buna baxmayaraq, nəqliyyat vasitəsi üçün texniki baxışdan keçmədiyinə görə ona cərimə tətbiq olunub.
Bu isə bir çox sürücnün ağlında sual doğurub:
İstifadə olunmayan, yəni aktiv şəkildə idarə edilməyən nəqliyyat vasitəsi üçün texniki baxışdan yayınmaya görə cərimə yazıla bilərmi?

Məsələ ilə bağlı hüquqşünas Ərşad Hüseynov saytımıza açıqlamasında bildirib ki, əgər nəqliyyat vasitəsi istismar edilirsə, o zaman "Yol hərəkəti haqqında" qanunun 14-cü və 30-cu maddələrinə əsasən, dövri texniki baxışdan keçməlidir. 
"İnzibati Xətalar Məcəlləsinin 339.1-1-ci maddəsində qeyd olunur ki, nəqliyyat vasitəsinin “Yol hərəkəti haqqında” qanunda nəzərdə tutulmuş qaydada texniki baxışdan keçirilmədən idarə edilməsinə görə cərimə nəzərdə tutulur. Yəni yalnız istifadə edilən, idarə edilən nəqliyyat vasitəsi nəzərdə tutulur”.

Hüquqşünas vurğulayıb ki, əgər nəqliyyat vasitəsi texniki baxışdan keçməyibsə, amma istifadə olunmursa, yəni idarə edilmirsə, bu zaman onun sürücüsü barəsində heç bir inzibati cərimə tətbiq edilə bilməz. 
"Qanun buna icazə vermir. Çünki yalnız texniki baxış dövriliyi pozulduqda sürücü cərimələnə bilər. Bu səbəbdən də, texniki baxış müddəti keçmiş, lakin istifadə olunmayan nəqliyyat vasitəsinə görə cərimə tətbiq olunarsa, sürücü Baş Dövlət Yol Polisi İdarəsinə şikayət edə bilər. Belə hallarda şikayət əsasında tətbiq olunmuş cərimə ləğv olunmalıdır”.

Fidan