Yol boyu siqaret çəkib telefonla danışan sürücü sərnişinləri təhlükəyə atdı - VİDEO

Sumqayıt şəhəri, İsmət Qayıbov küçəsində qayda pozan avtobus sürücüsü sərnişin tərəfindən videoya çəkilib.

Avtosfer.az-ın məlumatına görə, hadisə avqustun 5-də günorta saatlarında qeydə alınıb. Kadrdan da göründüyü kimi, 7 nömrəli müntəzəm marşrut xətti üzrə hərəkət edən 50-AF-379 dövlət nömrə nişanlı “Yutong” markalı avtobusun sürücüsü sükan arxasında siqaret çəkə-çəkə mobil telefonla danışıb. Hətta başı söhbətə qarışan sürücü hər iki əlini sükan çənbərindən də çəkib.

Sərnişinin iddiasına əsasən, sürücü nəqliyyat vasitəsini yüksək sürətlə idarə edərək yol boyu telefonla danışıb: “Normalda avtobuslar 16-cı mikrorayon dairəsindən “Kolxoz bazarı” adlanan əraziyə 30 dəqiqəyə çatır. Lakin sözügedən sürücü 15 dəqiqə sonra artıq bazarın dayanacağına çatmışdı”. 

Şikayətçi avtobusların əksəriyyətində azyaşlıların “konduktor” kimi işlədiyini də vurğulayıb.

O, məsələylə bağlı dəfələrlə Sumqayıt şəhər İcra Hakimiyyətinə müraciət etdiyini, lakin şikayətlərinin cavabsız qaldığını bildirib. 

Nərmin