Yol polisi 1 İyun – Uşaqların Beynəlxalq Müdafiəsi Günü ilə əlqədar yarış təşkil etdi - VİDEO

1 İyun – Uşaqların Beynəlxalq Müdafiəsi Günü ilə əlqədar Azərbaycan Respublikası Daxili İşlər Nazirliyi Baş Dövlət Yol Polisi İdarəsi və “1 nömrəli Uşaq-Gənclər İnkişaf Mərkəzi” publik hüquqi şəxsin birgə təşkilatçılığı ilə mərkəzdə məktəblilər arasında yarış-viktorina keçirilib.

Avtosfer.az xəbər verir ki, təşkil edilən tədbirdə Baş Dövlət Yol Polisi İdarəsinin şöbə rəisi Rövşən Tağıyev, idarənin bölmə rəisi Elvin Hacıyev və digər əməkdaşları, nəqliyyat eksperti Elməddin Muradlı, qəza əleyhinə kursların məşqçisi Aqil Rəhimov, bloger Saleh Nəsirov və mərkəz kollektivi iştirak edib. Tədbirin əsas məqsədi uşaqların hüquqlarının qorunması, onların maarifləndirilməsi, yol hərəkəti qaydaları haqqında biliklərinin artırılması, təhlükəsizlik qaydalarının təbliği və Uşaqların Beynəlxalq Müdafiəsi Gününün əhəmiyyətinin iştirakçılara çatdırılması olub. Yarışda ümumilikdə 4 komanda (“İşıqfor ulduzları”, “Yaşıl işıq”, “Yol dostları”, “Qayda keşikçiləri”) üzrə 20 nəfər uşaq iştirak edib.

İştirakçılar yol hərəkəti qaydalarına dair müxtəlif sual-cavab mərhələlərində öz bilik və bacarıqlarını nümayiş etdiriblər. Tədbir çərçivəsində uşaqlar tərəfindən yol hərəkəti təhlükəsizliyi mövzusunda rəsmlər çəkilib, maraqlı səhnəciklər nümayiş olunub və mahnılar səsləndirilib. Həmçinin uşaqlar arasında böyük maraqla qarşılanan skuter yarışı təşkil olunub. Yol hərəkəti qaydalarına aid yarış-viktorina uşaqlarda diqqət, məsuliyyət və düzgün davranış vərdişlərinin formalaşdırılmasına xidmət edib.

Yarışın sonunda dərnək üzvləri Baş Dövlət Yol Polisi İdarəsinin diplom və hədiyyələri ilə təltif olunublar.

Səfər