Sürücülər artıq texnoloji zənginlikdən bezirlər – TƏDQİQAT 

Baş ofisi Vaşinqtonda yerləşən  “J.D. Power” təşkilatının araşdırması zamanı məlum olub ki, avtomobillərdəki sensor ekranların ifrat çox funksiya daşıması sürücülərin peşəkarlığını aşağı salır. Bu həm də yol hərəkətinə təhlükə yaradır. 
 
Avtosfer.az xəbər verir ki, 100 min sürücünün iştirakı ilə aparılmış tədqiqat göstərir ki, sensor ekran sürücünün diqqətinin daha çox yayınmasına səbəb olur. Ən sadə bir komanda üçün sürücü ekran üzərində hansısa işarəyə basmalı, sürüşdürmə etməli və ya təsdiqləməlidir. Sensor ekrana yönələn hər saniyə qəza riskini artırır. Məsələn, kondisioneri işə salmaq üçün klassik sistemdə bir düyməni basmaq, yaxud, çevirgəcin  yönünü dəyişmək kafi idisə, sensor ekranda bundan 3 dəfə çox əməliyyat tələb olunur. 

İlk vaxtlar sürücülərə cazibəli görünən sensor ekran bir müddət sonra gözdən düşür. Digər tərəfdən, sürücülərin çoxu sensor ekrandan düzgün istifadə edə bilmir. Bir çox sürücü ənənəvi düymələrə qayıtmağın tərəfdarıdır. 

Qeyd edək ki, Avropa qurumları da bir müddət əvvəl avtomobil istehsalçılarına əsas funksiyaların klassik  düymələrlə icra olunması göstərişi verib. əks halda, 2027-ci ildən etibarən avtomobillər İttifaq ərazisində satıla bilməyəcək.

Vüqar