2026-cı ildə dünyanın ən gözəl yerləri - TOP-10

İspaniyanın şimalında yerləşən Pikos-de-Evropa dağ silsiləsi 2026-cı ildə dünyanın ən gözəl məkanı elan edilib.

Avtosfer.az Qaynarinfo-ya istinadən xəbər verir ki, reytinq məşhur turizm və əyləncə jurnalı "Time Out”un komandası tərəfindən hazırlanıb.

Siyahının müəllifləri qeyd edirlər ki, reytinq subyektiv xarakter daşıyır və tam siyahı hesab edilmir. Bununla belə, onlar vurğulayıblar ki, siyahıdakı hər bir məkan real səyahət təcrübəsinə əsaslanır.

"Məkanlar siyahısına daxil edilən hər bir çimərlik, göl, şəhər və vadini səyahətçi-müəlliflər şəbəkəmiz ziyarət edib və yoxlayıb. Qısası, onların hamısı səfər edib öz gözlərinizlə görməyə dəyər”, deyə məlumatda bildirilir.

Pikos-de-Evropa – Nə ilə seçilir?

Bu, dünyada ən kompakt dağ silsilələrindən biridir və sahildən cəmi 20 kilometr məsafədə yerləşməsinə baxmayaraq, 2650 metr hündürlüyə qədər yüksəlir.

"Bu, şübhəsiz ki, coğrafi möcüzədir və eyni zamanda qeyri-adi gözəllikdə mənzərələr yaradır. Pikos dağları dənizdən kəskin şəkildə yüksəlir, bu isə o deməkdir ki, mənzərələrə yalnız sıldırım dərələr və təhlükəli zirvələr deyil, həm də parlaq çimərlik zolaqları və coşğun Kantabriya dənizi daxildir”, deyə "Time Out”un britaniyalı müəllifi Ed Kanninqem bildirib.

Onun sözlərinə görə, Pikos-de-Evropa milli parkının ərazisində saysız-hesabsız gözəl məkanlar var: təcrid olunmuş möhtəşəm Naranxo-de-Bulnes zirvəsi, qədim dağ kəndləri Sotres və Kain, parlaq buzlaq gölləri Kovadonqa, eləcə də qayalıqda yerləşən və şəlalənin üzərində tarazlıq yaradan ziyarətgah.

Turistlərə xüsusilə Ruta-de-Kares marşrutuna diqqət yetirmək tövsiyə olunur. Bu, İspaniyanın ən məşhur piyada marşrutlarından biridir. Uzunluğu 23 kilometr (gediş-gəliş) olan cığır kanyon boyunca uzanır, zirvələr və şəlalələrdən keçir, bəzi hissələri isə qayaların içində oyulub.

2026-cı ildə dünyanın ən gözəl 10 məkanı

1. Pikos-de-Evropa, İspaniya

2. Komodo milli parkı, İndoneziya

3. Morqan Muzeyinin kitabxanası, Nyu-York, ABŞ

4. Douro vadisi, Portuqaliya

5. Big Sur, ABŞ

6. Ulsuoter, İngiltərə

7. Bolonya köhnə şəhəri, İtaliya

8. Kapo Testa, Sardiniya, İtaliya

9. Viktoriya şəlaləsi, Afrika

10. Punakha vadisi, Butan

Qeyd edək ki, ümumilikdə siyahıya dünyanın müxtəlif yerlərindən 51 möhtəşəm məkan daxil edilib.