Bakıda taksi sürücüsünün qeyri-adi tələbləri sərnişinləri təəccübləndirdi – FOTO

Bakıda taksi sürücüsünün avtomobilinin oturacağının arxasına yapışdırdığı qeyri-adi tələblər sosial şəbəkələrdə müzakirələrə səbəb olub. 

Avtosfer.az xəbər verir ki, sürücü sərnişinlərin davranış qaydaları ilə bağlı öz qaydalarını yazaraq onların bu şərtlərə əməl etməsini istəyib.

Qaydalarda “qapını asta örtün”, “yemək qadağandır”, “uşağa tərbiyə verin”, “telefonla danışmaq olmaz”, “asta danışın”, “maşında 2 qapı var”, “müddətdən artıq gözləməyin dəqiqəsi 50 qəpikdir”, “10 kq-dan artıq yükün kiloqramı 1 AZN-dir” kimi qeydlər əksini tapıb.

Sosial şəbəkə istifadəçiləri sürücünün bu yanaşmasını birmənalı qarşılamayıb. Bir qisim bunu sərnişinlərə qarşı hörmətsizlik kimi dəyərləndirərək narazılığını bildirib, digərləri isə qaydaların müəyyən qədər əsaslı olduğunu vurğulayıb.

Mütəxəssislər qeyd edirlər ki, taksi sürücülərinin müəyyən tələblər irəli sürməsi normal sayılsa da bu, sərnişinlərin hüquqlarını məhdudlaşdırmamalı, xidmət keyfiyyətinə xələl gətirməməlidir. Onların fikrincə, hər iki tərəf — həm sürücü, həm də sərnişin qarşılıqlı hörmət prinsiplərinə riayət etməlidir.

Eltac Zülfüqaroğlu