Bakıda təcili yardım sürücüsünün çətin anları belə GÖRÜNTÜLƏNDİ - VİDEO

Sosial şəbəkələrdə yayılan görüntülər bir daha göstərdi ki, təcili tibbi yardım sürücüsünün işi həm böyük məsuliyyət, həm də yüksək peşəkarlıq tələb edir.

Avtosfer.az xəbər verir ki, sürücünün paylaşdığı görüntülərdə hipotonik vəziyyətdə olan xəstənin yaşadığı ünvandan təcili şəkildə xəstəxanaya çatdırılması əks olunub. Kadrlardan görünür ki, sürücü yollardakı sıx nəqliyyat axınına, müxtəlif maneələrə və təhlükəli məqamlara baxmayaraq, maksimum diqqət və peşəkarlıq nümayiş etdirərək xəstəni qısa zamanda tibb müəssisəsinə çatdırmağa nail olub.

Sürücünün operativ və məsuliyyətli davranışı, eyni zamanda digər hərəkət iştirakçılarına ehtiyatla yanaşması sosial şəbəkə istifadəçilərinin rəğbətini qazanıb. Bir çox istifadəçi belə sürücülərin çətin şəraitdə həyat qurtarmaq üçün vaxtla yarışdıqlarını vurğulayaraq, onların əməyinin yüksək qiymətləndirilməli olduğunu qeyd edib.

Bu cür görüntülər bir daha xatırladır ki, təcili tibbi yardım avtomobilinə yol vermək təkcə qanunun tələbi deyil, həm də kiminsə həyatını xilas edə biləcək vacib bir addımdır.

Eltac Zülfüqaroğlu