Bu ölkədə elektromobilləri sürərkən şarj etmək mümkün olacaq – YENİLİK - FOTO

Elektrikli nəqliyyat vasitələri üçün şarj infrastrukturunda yaşanan problemlərin aradan qaldırılması məqsədilə Almaniyada mühüm yenilik sınaq mərhələsinə keçib.

Bavariya əyalətində asfaltın altına yerləşdirilən xüsusi rulonlar vasitəsilə avtomobillərin hərəkət zamanı simsiz enerji almasını təmin edən “E|MPOWER” sistemi test edilir.

Avtosfer.az xəbər verir ki, sınaqlar Nürnberqə yaxın Amberq-Vest və Sulzbach-Rosenberg yaşayış məntəqələri arasındakı magistral yolun bir hissəsində aparılır. Layihənin əsas məqsədi elektrikli nəqliyyat vasitələrinin dayanmağa ehtiyac qalmadan, birbaşa yol üzərindən enerji alaraq hərəkətini davam etdirməsidir.

Sistem asfalt örtüyünün təxminən 12 santimetr altında quraşdırılmış xüsusi spiral formalı rulonlar əsasında işləyir. Avtomobil bu hissədən keçərkən yaranan maqnit sahəsi enerjini nəqliyyat vasitəsinin alt hissəsində yerləşən qəbuledici qurğuya ötürür. Alınan enerji birbaşa hərəkət üçün istifadə olunur ki, bu da batareyanın yüklənmə dövrlərini azaldır və məsafə ilə bağlı narahatlığı minimuma endirir.

Mütəxəssislərin sözlərinə görə, E|MPOWER sistemi səmərəlilik baxımından ənənəvi sürətli şarj stansiyaları ilə rəqabət apara bilir. Hərəkət zamanı enerji ötürülməsinin səmərəliliyi təxminən 80 faiz, ümumi sistem səmərəliliyi isə 90 faizə yaxındır.

Aparılan testlər göstərib ki, yüksək səmərəliliyin qorunması üçün avtomobil rulonların üzərindən dəqiq trayektoriya ilə keçməlidir. Bir neçə santimetrlik yayınma belə enerji ötürülməsini azalda bilər. Bu səbəbdən gələcəkdə bu texnologiyadan istifadə edəcək avtomobillərin avtomatik zolaq saxlama sistemləri ilə təchiz olunması planlaşdırılır.

Layihənin inkişaf mərhələsinin təxminən beş il davam edəcəyi bildirilir. Eyni zamanda, sistemin Fransa, İsveç və Yaponiya kimi ölkələrdə həyata keçirilən oxşar layihələrlə inteqrasiya edilməsi nəzərdə tutulur. Məqsəd mobil telefonlarda olduğu kimi, elektrikli nəqliyyat vasitələri üçün də qlobal simsiz şarj standartının formalaşdırılmasıdır.

Mütəxəssislərin proqnozlarına görə, E|MPOWER texnologiyası ilə təchiz olunmuş ilk kommersiya yolları təxminən on il ərzində istifadəyə verilə bilər. Bu isə elektrikli nəqliyyatın inkişafında yeni mərhələnin başlanğıcı kimi qiymətləndirilir.

Eltac Zülfüqaroğlu