Dayanacaqlarla velozolaqların kəsişməsi problem yaradır; çıxış yolu nədir? – ARAŞDIRMA - FOTO

Bakıda velosiped zolaqlarının salınması müsbət addım kimi qiymətləndirilsə də, avtobus dayanacaqları ilə kəsişən hissələrdə təhlükəsizlik problemi hələ də qalmaqdadır. Xüsusilə sərnişinlərin avtobusa minib-düşdüyü məkanlarda velosipedçilərlə piyadalar arasında konflikt yaranır.

Avtosfer.az xəbər verir ki, beynəlxalq təcrübədə bu problemin sadə və effektiv həlli mövcuddur. Bir sıra ölkələrdə avtobus dayanacağı ilə velozolağın kəsişdiyi hissələrdə qaldırılmış platformalar təşkil olunur. Bu zaman velosipedçilər məcburən sürəti azaldır və piyadalara yol verirlər. Eyni zamanda avtobus sərnişinləri üçün daha təhlükəsiz və baryersiz mühit formalaşır.

Bu üsul həm ucuzdur, həm də yol hərəkətində konflikt nöqtələrinin azalmasına ciddi töhfə verir. Xüsusilə piyadaların sıx olduğu ərazilərdə bu cür həllər yol-nəqliyyat hadisələrinin qarşısının alınmasına kömək edir.

Qeyd olunur ki, Bakıda da bu təcrübənin tətbiqi vacibdir. Fotolarda “28 Mall” avtobus dayanacağının mövcud vəziyyəti və təklif olunan həll variantı göstərilir. Bu yanaşma velosipedçilər, piyadalar və ictimai nəqliyyatdan istifadə edənlər üçün daha təhlükəsiz və rahat hərəkət şəraiti yarada bilər.

Eltac Zülfüqaroğlu