Nizamidə tikinti zamanı anormal hadisə; ağacı divara hördülər - FOTO

Bakıda İmadəddin Nəsimi küçəsi 37 ünvanında maraqlı və eyni zamanda təəccüblü bir vəziyyət yaşanır. 

Avtosfer.az xəbər verir ki, Nizami rayonunda tikinti işləri aparılarkən bir ağacın divara hörüldüyü məlum olub.

Sakinlərin sözlərinə görə, tikinti rəsmi olaraq mənzil-kommunal istismar sahəsi üçün anbar adı ilə aparılır. Lakin yerli sakinlər iddia edirlər ki, əslində burada şəxsi qaraj inşa olunur. Daha maraqlısı odur ki, qarajı tikən şəxsin həmin mənzil-kommunal istismar sahəsində işlədiyi bildirilir.

Əraziyə baxış zamanı görünür ki, tikinti zamanı nə ağacın qorunması təmin olunub, nə də yaşıllığın zədələnməməsi üçün hər hansı tədbir görülüb. Divarın içində qalan ağac həm ekoloji baxımdan, həm də tikinti normaları baxımından ciddi qanun pozuntusu sayılır.

Sakinlər məsələ ilə bağlı aidiyyəti qurumlara müraciət etməyi planlaşdırır və ağacın taleyinin necə olacağı ilə bağlı narahatlıqlarını ifadə edirlər. Onların fikrincə, belə hallar ictimai nəzarətin və yaşıllıqların qorunması mexanizminin zəifliyini bir daha göstərir.

Hazırda tikintinin qanuniliyinin yoxlanılması və ağacın vəziyyəti ilə bağlı məsul qurumların reaksiya verməsi gözlənilir.

Eltac Zülfüqaroğlu