Sürücülərin qışda ən çox təkrarladığı səhv; maşını ağacların, binaların altında saxlamayın - TÖVSİYƏ

Qış aylarında donma temperaturu və güclü qar yağışı təkcə sürücülük təhlükəsizliyinə deyil, eyni zamanda park edilmiş nəqliyyat vasitələrinə də ciddi risk yaradır. 

Avtosfer.az xəbər verir ki, mütəxəssislər xəbərdarlıq edirlər ki, avtomobilin səhv yerdə saxlanılması səhər saatlarında minlərlə manat dəyərində təmir xərci ilə nəticələnə bilər.

Bu günlərdə havanın temperaturu sıfırdan aşağı düşdüyü üçün avtomobil sahiblərinin əsas problemləri mühərrikin işə düşməməsi və şüşələrin donmasıdır. Lakin mütəxəssislərin fikrincə, əsl təhlükə avtomobilin gecə harada park edilməsidir. Diqqətsiz seçilmiş dayanacaq yerləri kuzov zədələnməsindən tutmuş mexaniki nasazlıqlara qədər bir sıra bahalı problemlərə yol aça bilər.

Qış aylarında edilən ən böyük səhvlərdən biri avtomobili qorunacağını düşünərək binaların dam örtüklərinin və karnizlərin altına park etməkdir. Damların üzərində yığılan ağır qar və buz kütlələri temperaturun cüzi artması ilə qəfil qoparaq yerə düşə bilər. Tonlarla ağırlığa malik bu buz parçaları avtomobilin tavanını əzə, ön şüşəni sındıra və kuzovda ciddi zədələr yarada bilər.

Yay aylarında kölgə verən ağaclar qışda potensial təhlükə mənbəyinə çevrilir. Qarın ağırlığına tab gətirə bilməyən quru budaqlar qırılaraq avtomobilin üzərinə düşə bilər. Bundan əlavə, küləklə ön şüşəyə dəyən donmuş budaqlar soyuq hava şəraitində xırda çatların sürətlə böyüməsinə səbəb olur. Bu cür zədələr, xüsusilə sığorta ilə əhatə olunmadıqda, sürücülər üçün ciddi maliyyə itkisi yaradır.

Yağışdan sonra yaranan gölməçələrdə avtomobil saxlamaq da təhlükəlidir. Gecə temperaturun kəskin düşməsi suyun donmasına, təkərlərin yerə yapışmasına və ya əyləc diskləri ilə balataların donaraq kilidlənməsinə səbəb ola bilər. Səhər avtomobili hərəkətə gətirməyə çalışmaq əyləc və transmissiya sisteminə ciddi ziyan vura bilər.

Qarlı havada yamaclarda park etmək sürüşmə riskini artırır. Nəqliyyat vasitəsi öz-özünə sürüşərək həm özünə, həm də ətrafdakı avtomobillərə zərər verə bilər.

Mütəxəssislər yamacda park etməli olduqda təkərlərin səkiyə doğru çevrilməsini və mütləq təkər tıxaclarından istifadə edilməsini tövsiyə edirlər.

Bələdiyyənin qar təmizləyən texnikasının hərəkət etdiyi ərazilərdə park edilmiş avtomobillər təmizləmə zamanı atılan sərt buz parçalarından zədələnə bilər. Eyni zamanda yol kənarlarında yığılan duzlu qar avtomobilin alt hissəsində, disklərdə və şassidə korroziyanın (paslanmanın) sürətlənməsinə səbəb olur. Mütəxəssislər qış mövsümündə avtomobilin alt hissəsinin mütəmadi yuyulmasının bu riskləri azaltdığını bildirirlər.

Qeyd olunur ki, sadə görünən parketmə qərarları qış aylarında avtomobil sahibləri üçün ciddi maddi itkilərlə nəticələnə bilər. Bu səbəbdən sürücülərə avtomobillərini təhlükəsiz və riskdən uzaq ərazilərdə saxlamaq tövsiyə olunur.

Eltac Zülfüqaroğlu