Tavan baqajı avtomobilin yanacaq sərfiyyatına təsir göstərir? – ARAŞDIRMA

Uzun yola çıxan sürücülər avtomobilin üzərində quraşdırılan tavan baqajının yanacaq sərfiyyatına təsirini nəzərə almalıdırlar. Mütəxəssislər bildirirlər ki, istifadə olunmadığı halda belə avtomobilin üzərində saxlanılan tavan baqajı hava müqavimətini artıraraq yanacaq sərfiyyatının əhəmiyyətli dərəcədə yüksəlməsinə səbəb ola bilər.

Avtosfer.az xəbər verir ki, xüsusilə yay tətili və uzun səfərlər zamanı istifadə edilən tavan baqajları avtomobilin aerodinamik quruluşunu dəyişir. Bu isə mühərrikin eyni sürəti qorumaq üçün daha çox güc sərf etməsinə və nəticədə yanacaq sərfiyyatının artmasına səbəb olur.

Məlumata görə, tavan baqajının yaratdığı əlavə yanacaq sərfiyyatı sürət artdıqca daha da yüksəlir. Şəhər daxilində aşağı sürətlərdə bu göstərici təxminən 2–5 faiz təşkil etdiyi halda, magistral yollarda fərq daha ciddi ola bilər.

Texniki sınaqların nəticələrinə əsasən, saatda təxminən 110 kilometr sürətlə hərəkət zamanı tavan baqajı yanacaq sərfiyyatını 15–25 faiz, saatda 95 kilometr sürətlə hərəkətdə isə 10–15 faiz artıra bilər.

Tavan baqajının ölçüsü böyüdükcə hava müqaviməti də artır. Xüsusilə həcmi 600 litr və daha çox olan iri baqaj qutuları avtomobilin aerodinamikasına daha ciddi təsir göstərə bilər.

Avtomobil üzrə mütəxəssis Pol Qorri sürücülərə səfər başa çatdıqdan dərhal sonra tavan baqajını avtomobildən çıxarmağı tövsiyə edib.

Onun sözlərinə görə, baqaj səfər zamanı avtomobilin üzərində qalmalıdırsa, magistral yolda sürəti azaltmaq yanacaq sərfiyyatını müəyyən qədər aşağı sala bilər. Məsələn, saatda 110 kilometr əvəzinə 95 kilometr sürətlə hərəkət etmək yanacaq sərfiyyatının 15–20 faiz azalmasına kömək edə bilər.

Mütəxəssislər həmçinin sürücülərə ehtiyacdan daha böyük tavan baqajı seçməməyi, avtomobili qəfil sürətləndirməkdən və sərt əyləcləmələrdən mümkün qədər çəkinməyi məsləhət görürlər.

Eltac Zülfüqaroğlu