Yadplanetli həyatın mümkün olduğu 45 məkan: Ən yaxın planet hansıdır?

Astronomlar yadplanetli həyatın mövcud ola biləcəyi ən perspektivli 45 planeti müəyyən ediblər. 

Avtosfer.az Qaynarinfo-ya istinadən xəbər verir ki, bu barədə "The Independent" nəşri "Monthly Notices of the Royal Astronomical Society" jurnalında dərc olunan araşdırmaya istinadən yazır.

Hazırda alimlər Günəş sistemindən kənarda yerləşən 6000-dən çox ekzoplanet aşkar ediblər. Lakin onların əksəriyyəti çox yüksək və ya çox aşağı temperatur, eləcə də digər əlverişsiz şərait səbəbindən yaşayış üçün uyğun hesab edilmir.

Seçilmiş planetlər arasında "Proxima Centauri b", "TRAPPIST-1f" və "Kepler-186f" kimi tanınmış obyektlər də var. Tədqiqatçılar hesab edirlər ki, bu siyahı gələcəkdə yadplanetli həyatın izlərini tapmaq və kosmik missiyaları planlaşdırmaq üçün əsas istiqamət olacaq.

"Yaşayış zonası” anlayışı

Araşdırmada planetlərin yaşayış üçün uyğunluğunu müəyyən edən "yaşayış zonası” (və ya "qızıl orta”) konsepsiyasının da yoxlanılması nəzərdə tutulur. Bu, ulduz ətrafında temperaturun maye suyun mövcudluğuna imkan verdiyi sahədir.

Alimlər bu zonanın sərhədlərində yerləşən planetləri araşdıraraq, bu modelin nə dərəcədə etibarlı olduğunu daha yaxşı anlamağa çalışırlar.

TRAPPIST-1 sistemi diqqət mərkəzində

Ən çox maraq doğuran obyektlərdən biri təxminən 40 işıq ili uzaqlıqda yerləşən "TRAPPIST-1" sistemidir. Bu sistemdəki bəzi planetlər öz ulduzlarından Yerə bənzər şəkildə enerji alır.

Bununla belə, əsas amil atmosferin mövcudluğudur. Çünki atmosfer suyun saxlanması üçün vacibdir və bu da həyatın yaranmasının əsas şərtlərindən biridir.

Tədqiqatın müəlliflərindən biri, aspirant Gillis Lauri bildirib ki, planetin yaşayış üçün uyğun olub-olmadığını dəqiq müəyyənləşdirmək çətin olsa da, ilk addım harada axtarış aparılacağını bilməkdir.

Gələcək müşahidələr

Hazırlanan siyahının "James Webb" Kosmik Teleskopu, "Nancy Grace Roman" teleskopu və "Extremely Large Telescope" kimi müasir və gələcək müşahidə vasitələri üçün istiqamətverici olacağı gözlənilir.

Növbəti mərhələdə alimlər bu planetlərin atmosferə sahib olub-olmadığını araşdıracaqlar. Bu isə onların həyat üçün yararlılığını müəyyən edən əsas meyardır.