Anar Paşayev motosiklet yığdı, qeydiyyata aldıra bilmir; nə etməli? - FOTO

Fərdi qaydada hazırlanan elektrikli nəqliyyat vasitələrinin qeydiyyatı ilə bağlı vətəndaşlar arasında suallar yaranmağa davam edir.

Vətəndaşlardan biri bununla bağlı Avtosfer.az-ın qaynar xəttinə müraciət edərək bildirib ki, o, borulardan qaynaq etməklə fərdi qaydada elektrikli moped yığıb. Onun sözlərinə görə, nəqliyyat vasitəsinin maksimal sürəti 45 km/saatdır, lakin pedalları yoxdur.

Vətəndaş qeyd edib ki, yeni qaydalara əsasən belə nəqliyyat vasitələrinin dövlət qeydiyyatına alınaraq nömrə nişanı əldə etməsi tələb olunur. Ancaq moped zavod istehsalı olmadığından onun heç bir sənədi, gömrük bəyannaməsi və ya ban (VIN) nömrəsi mövcud deyil.

O, bu səbəbdən belə bir sual ünvanlayıb: "DYP sənədsiz mopedlərin qeydiyyatını həyata keçirdiyi bu dövrdə, mənim fərdi qaydada hazırladığım bu nəqliyyat vasitəsini qanuniləşdirmək və ona dövlət qeydiyyat nişanı almaq üçün qanunvericilikdə hər hansı keçid müddəası və ya prosedur varmı? Yoxsa bu texnikanın ümumiyyətlə yollarda istismarı mümkün olmayacaq?"

Avtosfer.az-ın məlumatına görə, belə hallarda vətəndaş ilk növbədə Baş Dövlət Yol Polisi İdarəsinə müraciət etməlidir. Müraciət əsasında nəqliyyat vasitəsinə baxış keçiriləcək və onun qeydiyyata alınıb-alınmaması ilə bağlı müvafiq qərar veriləcək.

Zərurət yarandığı halda nəqliyyat vasitəsi texniki ekspertiza üçün aidiyyəti müəssisəyə və ya zavoda yönləndirilə bilər. Həmin ekspertizanın rəyindən sonra isə fərdi qaydada yığılmış elektrikli mopedə müvafiq sənədin verilməsi və dövlət qeydiyyatına alınmasının mümkün olub-olmaması barədə yekun qərar qəbul ediləcək.

Eltac Zülfüqaroğlu