Bakıda bu ərazilərdə yeni dayanacaq pavilyonları quraşdırıldı – FOTOLAR

Paytaxtın müxtəlif ərazilərində sərnişinlərin uzun müddətdir üzləşdiyi dayanacaq problemi aradan qaldırılıb.

Avtosfer.az xəbər verir ki, “Jurnalistika və İnkişaf Mərkəzi” İctimai Birliyi tərəfindən aparılan monitorinqlər və araşdırmalar zamanı Bakı şəhərinin bir sıra ərazilərində avtobus dayanacaqlarında pavilyonların olmadığı müəyyən edilib.

Araşdırmalar zamanı Nizami rayonu, Bəkir Çobanzadə küçəsində yerləşən 109 nömrəli tam orta məktəbin yaxınlığında, Xətai rayonu, 8 Noyabr prospektində AFFA-nın inzibati binasının qarşı tərəfində, eləcə də Xəzər rayonu, Binə qəsəbəsi, Əli İsazadə küçəsində yerləşən 121 nömrəli məktəbin yaxınlığında sərnişinlərin dayanacaq pavilyonu olmadan ictimai nəqliyyatdan istifadə etdiyi məlum olub.

Bununla bağlı “Jurnalistika İnkişaf Mərkəzi” İctimai Birliyi tərəfindən Azərbaycan Yerüstü Nəqliyyat Agentliyinə (AYNA) rəsmi müraciət ünvanlanıb.

Müraciət əsasında agentlik tərəfindən qeyd olunan ərazilərdə araşdırmalar aparılıb. Araşdırmalar nəticəsində həmin nöqtələrdə dayanacaq pavilyonlarının quraşdırılması üçün zəruri şəraitin mövcud olduğu müəyyən edilib.

Nəticədə İctimai Birliyin təklifi nəzərə alınaraq sözügedən ərazilərdə yeni dayanacaq pavilyonları quraşdırılıb və sərnişinlərin istifadəsinə verilib.

Qeyd edək ki, dayanacaq pavilyonlarının quraşdırılması sərnişinlərin günəşli, yağışlı və küləkli hava şəraitində daha rahat gözləmə imkanına malik olmasına, eyni zamanda ictimai nəqliyyat infrastrukturunun əlçatanlığının və komfortunun artırılmasına xidmət edir.

Eltac Zülfüqaroğlu