Maşının şüşələrinin donması əleyhinə ən məsləhətli üsul budur – ARAŞDIRMA - FOTO

Qış aylarında sürücülərin ən çox rastlaşdığı narahatlıqlardan biri avtomobil şüşələrinin buxarla örtülməsi və buzlanmasıdır. Xüsusilə səhər saatlarında bu problem həm görmə sahəsini məhdudlaşdırır, həm də yola çıxmazdan əvvəl əlavə vaxt itkisinə səbəb olur. Lakin ev şəraitində sadə inqrediyentlərlə hazırlanan bir qarışıq bu narahatlığı aradan qaldıra bilər.

Avtosfer.az xəbər verir ki, sosial şəbəkələrdə minlərlə insan tərəfindən paylaşılan bu üsul həm təsirli, həm də təhlükəsiz nəticə verir. Bunun üçün bir qaşıq ağ sirkə, bir stəkan ilıq su və istəyə görə az miqdarda qabyuyan maye qarışdırılır. Qarışıq bir sprey şüşəsinə tökülür və avtomobilin ön, yan və arxa şüşələrinə səpilir. Daha sonra mikrofiber parça ilə dairəvi hərəkətlə silinir. Nəticədə şüşələr parıldayır, dumanlanma və buzlanma isə uzun müddət müşahidə olunmur.

Sirkənin təbii asidik xüsusiyyəti şüşə üzərindəki donu tez əridir, qabyuyan maye isə səthdə nazik qoruyucu təbəqə yaradaraq yeni dumanlanma və buzlanmanın qarşısını alır. Bu üsul həm vaxtınıza, həm də büdcənizə qənaət etməklə yanaşı, kimyəvi maddələrə alternativ olaraq daha ekoloji bir həll təqdim edir.

Avtomobil baxımı üzrə mütəxəssislər bildirirlər ki, sirkə güclü turşu olduğundan avtomobilin boya, plastik və metal hissələrinə birbaşa tətbiq olunmamalıdır. Qarışıq yalnız şüşə səthlərinə çəkilməlidir, əks halda uzunmüddətli zədələnmələr baş verə bilər.

Sirkə qoxusunu sevməyənlər üçün başqa bir effektiv üsul da mövcuddur. Bunun üçün izopropil spirt və ya limon odekolonu ilə su qarışdırılır, az miqdarda qabyuyan maye əlavə olunur və eyni qaydada istifadə edilir. Spirt donu tez əridir, yuyucu vasitə isə səthdə qoruyucu qat yaradaraq buzun yenidən əmələ gəlməsini ləngidir.

Bu üsullardan biri axşam saatlarında tətbiq edildikdə, səhər avtomobilin şüşələrinin buz bağlamasının qarşısı əhəmiyyətli dərəcədə alınır. Beləliklə, qış səhərləri həm daha rahat, həm də təhlükəsiz başlayır.

Eltac Zülfüqaroğlu