Yaşıl işıqda dönən sürücüyə cərimə yazıla bilər? – İZAH – VİDEO

Svetoforun yaşıl işığında hərəkət edən sürücülərin sağa və ya sola dönərkən piyadalara yol verib-verməməsi tez-tez müzakirə olunan məsələlərdəndir.

Avtosfer.az xəbər verir ki, nəqliyyat eksperti Rüfət Əmiraslanov sürücülərin bu zaman yol hərəkəti qaydalarına diqqət etməli olduğunu bildirib.

Onun sözlərinə görə, sürücü svetoforun yaşıl işığında düz istiqamətdə hərəkət edərkən qarşısında keçidə icazə verilən piyadaya görə dayanmalı deyil. Lakin sağa və ya sola dönmə zamanı vəziyyət dəyişir.

“Əgər siz yaşıl işıqda düzünə hərəkət edirsinizsə, digər istiqamətdə hərəkət edən və ya keçidə icazəsi olmayan piyadanı gözləmirsiniz. Amma sağa və ya sola dönərkən həmin istiqamətdəki piyada keçidində piyadalar üçün yaşıl işıq yanırsa, onlara yol verməlisiniz”, – deyə ekspert bildirib.

Rüfət Əmiraslanov qeyd edib ki, dönmə zamanı sürücü piyada keçidindən istifadə edən şəxslərin hərəkətinə mane olmamalıdır. Bu tələbə əməl edilməməsi inzibati məsuliyyət yarada və sürücünün cərimələnməsinə səbəb ola bilər.

Ekspert sürücülərə svetoforun yalnız özləri üçün yanan yaşıl işığına deyil, dönəcəkləri istiqamətdə piyadalar üçün müəyyən edilmiş keçidə və svetofor siqnallarına da diqqət yetirməyi tövsiyə edib.

Eltac Zülfüqaroğlu