Astarada avtoxuliqanlıq edən şəxs qəza törədib

Astarada avtoxuliqan yol hərəkəti qaydalarını pozaraq qəza törədib. 

APA-nın cənub bürosunun verdiyi məlumata görə, Astara Rayon Polis Şöbəsi Dövlət Yol Polisi Bölməsinin əməkdaşları tərəfindən yol hərəkəti qaydalarını kobud şəkildə pozaraq, piyadalara və yol hərəkəti iştirakçılarına ciddi təhlükə yaratmaqla qəza törədən sürücü saxlanılıb. 

Bakı şəhər sakini Hikmət Hətəmli idarə etdiyi “Merсedes” markalı, 99-SR-457 dövlət qeydiyyat nişanlı avtomobillə Astara şəhəri ərazisində avtoxuliqanlıq hərəkətləri edib. Daha sonra idarəetməni itirib və avtomobili yolun kənarında dayanmış "Nissan" markalı maşına vurub. 

Dövlət Yol Polisi əməkdaşları tərəfindən saxlanılan H.Hətəmlinin avtomobili etibarnaməsiz, həmçinin sürücülük hüququ olmadan idarə etdiyi məlum olub. İntizamsızlıq edən, yol hərəkəti qaydalarını kobud şəkildə pozan həmin şəxs barəsində inzibati qaydada protokol tərtib olunaraq baxılması üçün Rayon Məhkəməsinə göndərilib.